Sdang ka UDP Mawlai ban pyni paid, mih da ki hajar ban ïaid kjat na Nongpdeng haduh Mawroh

0

Shillong, K’Lyngkot 25 : Ka United Democratic Party Mawlai hynne ka sngi Balang ka la sdang ïa ka jingïalap elekshon da kaba pyni paid lyngba ka jingïaid rally da ka kjat na Mawlai Nongpdeng ter ter haduh Mawlai Mawroh.
Ha katei ka jingïaid paidbah la donlang ruh u kyrtong ka party, Bah Process T Sawkmie, u MLA ka thaiñ uba dang shu dep resaiñ shen shwa ban leit pynïasoh noh sha ka party UDP.
Nalor ki hajar ngut ki paidbah kiba shim bynta, la wan pynshngaiñ lang ïa katei ka jingïaid paidbah da u President Rangbah ka party ba dei ruh u Lamphang ka Iing Dorbar Thawaiñ ka jylla, Bah Metbah Lyngdoh nalor kiwei kiwei ki nongïalam ka party.
Mar ïa kut ka jingïaid paidbah, ki nongïalam ka UDP Mawlai ki la pynlong ruh ka jingpdiang burom ïa u Bah Process sha ka party hadien ba utei u kyrtong um shym la lah ban donlang bad ki saw ngut kiwei ki MLA ba resaiñ na kiwei pat ki party ha ka jingïalang pdiang burom ba pynlong da ka UDP dang shen.
Hadien kane, u Bah Process haba kren ha ka jingïalang u la ong ba katei ka jingïaid paidbah kadei ka dak jong ka jingsdang ïa ka jingpynkhreh na ka bynta ka elekshon kaban sa long shen ha u Rymphang mynta u snem.
“Kadei ruh ka dak jong ka jingjop na ka bynta ka UDP ha Mawlai, ha Shillong bad ka UDP ha Khasi Jaintia bad ha ka jylla hi baroh kawei. Ngi don ka jingkyrmen kaba khraw ba ka UDP ha une u 2023 kan ïoh ban bat ïa ka bor synshar,” u la ong da kaba bynrap ruh ba kin sa sei ïa u nongïalam na ka UDP ban ïalam ïa ka Jaidbynriew hi baroh kawei.
Utei u MLA ka Congress ba dang shu dep resain shen u la ong ruh ba kim kwah shuh ban ïohi ba ka party thymmai ba ïalam da u Myntri Rangbah barim ha ka sorkar Congress kumjuh ïa ka sorkar NPP kaba la ïalam mynta san snem ba kin synshar biang ïa ka jylla.
U ong ruh ba watla u dang shu ïasoh shen sha ka UDP, hynrei u ïohi pat ba ka NPP kadei ka seng ka bym burom ïa ki party ba don lang ha ka sorkar, kumta u ong ba ki kyrmen ba kane ka kynti ka party kan ïoh ban ïalam ïa ka sorkar ba thymmai.
Ha kajuh ka por, u Bah Process u la kynthoh tyngeh ïa ka All India Trinamool Congress (AITC) halor ka jingkylla ktien jong ka haba ïadei bad ka nongrim ba ka ieng halor ka jingdawa Inner Line Permit ha ka jylla.
“Ka long kaba lyngoh ba watla ka elekshon kam pat sdang hynrei ngi la ïohi ba ka TMC ka la da kylla ktien. Nyngkong haba ka TMC ka wan sha Meghalaya, ka khliehduh jong katei ka party ka la ong ba kin dawa ïa ka ILP. Kumta nga buh jingkylli ïa ka TMC balei pat ka ILP ka khlem don ha ka mat ïakhun elekshon jong ka,” ong u Bah Process.

Leave A Reply

Your email address will not be published.