Sdang ka Save Hynñiewtrep Mission da kaba tur ki 5 Seng sha Secretariat

Shillong, Naiwieng 01: Ka “Save Hynñiewtrep Mission”(SHM) ka la sdang mynta ka sngi da ka jingïatur paidbah kynsan kynsan ki dkhot jong ki San tylli ki Sengbhalang sha Secretariat.
Kine ki san tylli ki seng ki long ka HYC, HANM, JSM, ENJC bad CORP. Ha ka jingshisha ka District Magistrate jong ka East Khasi Hills District ka la pynjari da ka Section 144 CrPC naduh ka miet Lah Sngi U Blei ban khanglad ïa kano kano ka jingtur paidbah bad ka jingïalum paidbah ha nongbah Shillong.
Hynrei ka jingmih paidbah jong ki seng mynta ka sngi Baar ka la pynkulmar thlim ïa ki Pulit haba kawei ka kynhun ba ïalam ka HYC ka tur na shaphang IGP Point bad kawei ka kynhun ba ïalam da ka HANM ka tur na shaphang Shillong Club.
Hynrei ki Magistrate bad ki Pulit kiba la ïoh jingtip ïa kane ka jingwan tur kynsan kine ki Seng ki la ap pahara bha bad khanglad ïa ki dkhot jong ki Seng ban shu tur ruma sha Secretariat. Hadien kham hadien katto katne por u Myntri Kam Pohïing ka jylla, u Bah Lahkmen Rymbui, u la phah khot ban ïakynduh ïa ki nongïalam jong kine ki San Seng ban ïakynduh ïa ha kamra treikam jong u ha kaba kine ki San Seng ki la aiti ïa ki 9 tylli ki mat jingdawa jong ka SHM. Na ka liang u Bah Rymbui u la ong ba un sa rah ïa kine ki mat jingdawa hakhmat ka sorkar.
Ki 9 tylli ki mat jingdawa ki long ka jingpyntreikam noh ïa ka ILP, ka jingithuh ïa ka ktien Khasi, jingpynkynriah ïa ka them Metor, ban pynbeit thymmai ïa ka Reservation Policy, ban pynbeit biang ïa ka MoU-1, ban tohkit CBI halor ki kam bamsap, ban tohkit CBI ba shah siat ïap u Bah Cherish, ban thungkam mardor ïa ki kam kiba thylli ha jylla, ban weng mardor ïa ka aiñ khalai.
Da kaba pynkheiñ ïa ka kyndon 144Cr. PC, da ki spah ngut ki dkhot jong kine ki 5 Seng ki la ïapyrta shla ban pynrem ïa ka sorkar MDA bad ïa ki Myntri ka sorkar ryngkat ka jingpyrta ban pyntreikam noh ïa ki 9 tylli kimat jingdawa. La pynshongshit ïa kane ka jingïatur bad jingïapyrta da ka jingïatem ïa ka ksing ka dhah.
U Bah Roy Kumar Synrem uba la ïalam ban ïakynduh ïa u Bah Rymbui, u la ong ba ka SHM kan bteng beit ki jingïakhih kiba kyndit kyndit kumba long mynta ka sngi bad kan pynkheiñ beit ïa ka kyndon 144 CrPC.
Katba u Bah Lamphrang Kharbani, nongïalam ka HANM, u la ong ba lada ka sorkar kan lah ban pynurlong ïa ki jingdawa kiba na ka por sha ka por jong ki Sengbhalang, kan poi ka por ba kin mih ki Seng Lehnoh bad ha kata ka por ka sorkar jylla bad ka sorkar pdeng kidei ban kitkhlieh, namar ba ïa ka ILP bad ïa ka ktien Khasi kaba la mynjur da ka Meghalaya Legislative Assembly ruh ka sorkar u Modi haduh mynta kam pyntreikam satia. Katba ka sorkar jylla pat ïa ki mat kiba ïadei bad u pud u sam la shu pynbeit kyrkieh kat haduh ba kiba bun ki jaka ki la leit lut sha Assam bad ka polisi thungkam ruh kadei kaba lah shiliang.