12 tylli ki kyndon pynngat ki Pulit ïa u GS ka FKJGP ba mih jingkulmar por ïaid rally

0

Shillong, Naiwieng 01: U General Secretary ka FKJGP u Bah Eldie N Lyngdoh ha ka sngi Ba-ar u la shah khot hajir ha Sadar Police Station halor ki kyndon ba la pynngat da ka Laitumkhrah Police Station ha kaba ïadei bad ka jingtied jingbom ïa ki nongleit nongwan bad ka jingkulmar kaba mih ha ka jingïaid rally kaba la pynlong da ka seng ha ka 28 tarik u Risaw na Motphran sha Madan ïewrynghep.
Haba kren bad ki lad pathai khubor hadien ba la mih na ka jaka hajir ha ki pulit, u Bah Eldie u la ïathuh ba na ka liang ka Laitumkhrah Police Station ka la pynngat haduh 6 tylli ki kyndon aiñ kata hapoh ka Section 341, 324, 353, 505, 506 bad 34 jong ka Indian Penal Code.
U la ïathuh ruh ba nalor kitei ki 6 tylli ki kyndon kiba u la shah khot hajir kiba la pynngat da ka Laitumkhrah PS u la shah pynngat ruh sa 6 tylli ha ka Sardar PS kaba un hap leit hajir ha ka 4 tarik Naiwieng ha Sardar PS.
Haba kylli la ka seng ka shim jingkitkhlieh halor ka jingjia ba la mih ha kato ka sngi, u Bah Eldie u la ong ba shisien ba ka jia ha ka jingïalang ba la khot da ka seng ka jingkitkhlieh lei ka la dei lypa ha ka seng ban shim.
Haba ïa dei bad ka jingkam u Myntri Rangbah ba ki pulit ki la kem ïa uwei ba donkti ban shoh ban dat ïa ki nongleit nongwan ha ka sngi ïaid rally ka FKJGP, u Bah Eldie u la ong ba haduh mynta na ka liang ka seng kam don jingtip mano uta u dkhot jong ka u la shah kem bad na ka liang jong ka seng ruh ka dang wad jingtip halor kane.
Lah ban kdew ba ha ka jingïaid jong ka FKJGP pyrshah ïa ka jingbym ïohkam ki samla kiba la nang la stad ha ka jingïasynrop lang ryngkat kiwei ki sengbhalang ba kynthup ïa ka KSU bad HNYF, RBYF, ka la mih ka jingïakulmar kaba ka don ka jingshah tied shah bom ki nongleit nongwan bad ka jingpynjulor ïa ki kali bad ki ar shaka da ki katto katne ngut kiba ïashim bynta ha ka jingïaid paidbah kiba la tap ïa ka durkhmat kiba na ka liang ka FKJGP ka ong ba ki dei ki riew shim kabu kiba wan pynthoh bria ne lehse ka dei namar ka jingsngew dukha mynsiem ki khun samla na ka daw ka jingbym ïohkam jong ki.

Leave A Reply

Your email address will not be published.