Shillong, Naiwieng 1 : Sa ka BJP mynta ka la kob ban ïoh thaw sorkar namar u President jongka u bah Ernest Mawrie u la kob ba ka BJP kan jop palat 10 ngut ki MLA bad kan ïoh thaw ia ka sorkar ha u 2023.
Kumba long mynta ka BJP ka don tang 2 ngut ki MLA bad mynta ki kob ban palat ïa ka 10 ngut ha u 2023.
“ Ngi dei ka National Party kaba heh tam ha India ngi don la ki jong ki buit treikam ha ka jingïakhun ïa ka election bad ngan ïathuh ïa phi ha kane ka kynti ngin jop palat ïaka 10 bad ngin sa ïoh ban thaw ïa ka sorkar ba thymmai da ka thong ban wanrah ïa ka roi ka par ha ka jylla” ong u bah Mawrie.
U la ïathuh ba ka BJP kan ïakhun na baroh 60 tylli ki Constituency bad na kine kumba 40 tylli ki dei kiba ka BJP kan ïakhun bad don jingkyrmen ban jop bad ki dei ruh kiba la don lypa ki kyrtong. “ Haduh mynta ngim pat lah ban jer kyrteng ïa kine ki kyrtong wat la katta ruh ngi la long kiba la pynkhreh ha baroh ki constituency. Ngi khlaiñ bha mynta bad ngin jop bun beit ha kane ka kynti” ong biang u bah Mawrie.
U la ïathuh ba ki don 5 ngut ki MLA kiba la pynpaw ba ki kloi ban wan pynïasoh sha ka party shwa ka election. Ha ka taiew ba nyngkong jong u Nohprah kiei kiei baroh ki la shai lut bad ka jingïakren ïa pynbeit bad ki MLA ruh ka dang ïaid shakhmat. Ki la pynpaw ba ki la long kiba la pynkhreh ban pynïasoh noh sha ka BJP.
U bah Mawrie u la ong ba ka don ka jingkyrmen ïa ka BJP ban jop bun ha Meghalaya namar ka la trei bha ïa ki kam. U la ïathuh ba da ki spah tylli ki skhim na ka sorkar pdeng ki la wan sha ka jylla Meghalaya.
“ Haduh mynta u khaw sam ei sha ki paidbah ba la ai da u myntri rangbahduh u Narendra Modi ruh un dang treikam beit. Ngi khlem shakri tang na shyntur hynrei da ki kam kumba la kular ïaki paidbah. Ngi la ïarap ïa ki nongbylla ban ïoh ïa ka insurance scheme. Kine ki skhim baroh kin ïarap ïa ka BJP ban nang jan sha ki paidbah. Kiwei ki party ki kular ban pynbeit pud, ban ai surok naei kin ïoh na kata ka daw ngi kyrpad ïa ki paidbah ban ailad ïa ka BJP ha kane election ban wan” ong biang u bah Mawrie. U la ong ruh ba ka jylla Meghalaya ka donkam da ka sorkar kaba don ar enjin.
“ Lada ka don ka BJP ha Delhi bad kan don hangne ha Mehalaya ruh kan wanrah bun ki jingkylla kumba la long ha Assam. Ha Assam kawei pa kawei ka District ki la don ka Medical College, ka Cancer Hosital, Engineering College, ki surok kiba bha, ki flyover. Kumta ngi ruh ha kane ka kynti ngi kwah ïa ka roi ka par kumba thrang ki paidbah” u la ong biang.
Halor ka jingkynthoh jong u Kiren Rijiju dang shen ba hato ka BJP kan ai ïa ka ILP lada ka jop bun ki MLA ha u 2023, u bah Mawrie u la ong ba ka ILP ka dang don hapdeng ka jingbishar jongka tnad kam pohïing ka sorkar pdeng bad kumta ym lah ban kynthoh halor kane na ka party namar ngi kyrpad ïa ka sorkar pdeng na ka por sha ka por ban bishar bniah kloi ïa kane ka kam.
Halor ka jingkyrduh kam kyrduh jam u la ong ba u myntri rangbah u la kular ba un ai kam 10 lak ngut shwa ban kut une u snem bad tang ha katei ka sngi ba u pynbna ruh la thung kam 75227 ngut. Wat hangne ha nongbah Shillong ruh u myntri ula wan ban ai iaki shithi thung kam, kane ka dei tang ka jingsdang bad yn dang pynrung kam shuh shuh ïaki samla. U la ong ka sorkar jylla ruh ka dei ban thung kam kloi noh ha ki palat 8000 tylli ki kam ba lait thylli ha ki tnad sorkar bapher bapher.
