Sdang ka Meghalaya State A Chess Championship ha sor Nongstoiñ

Nongstoiñ, Naiwieng 04 : Ka West Khasi Hills District Chess Asso-ciation ha ka sngi Thohdieng, ka la plie pyrda ïa ka lympung jingïalehkai Chess ïa kaba la tip kum ka 45th Meghalaya State A Chess Championship ka ban neh mynta kumba ar sngi lynter ha Hall jong ka Nongstoiñ Social Service Society Nongstoiñ
Ïa katei ka lympung la wan ban plie pyrda da u Bah Macmillan Byrsat MLA ka Nongstoiñ konstitwensi, ha ryngkat ka jingïasynranlang lang u Bah K.M.Warjri President ka Meghalaya Chess Association, bah Richard Sun President ka West Khasi Hills District Chess Association, bah Boney Kharbani Secretary ka West Khasi Hills District Chess Association bad kiwei kiwei, kynthup ruh ïa uwei u heprit u ba la tip kyrteng kum u Advitiya A Gunanka 6 snem ka karta u ba la bat ïa ka nam lahduh ha ka Under 10 Chess Championship Meghalaya State Level.
Katei ka jingïalehkai ka long laitluid ïa baroh (Open to all), hynrei ka don ruh ka bhah kyrpang ïa ki khynnah skul tang na ka bynta kiba na West Khasi Hills District, katba 4 ngut ki ban sa jop bad kiba kham wan ha khmat na katei ka jingïalehkai, kin mihkhmat ban leit ïashimbynta na ka jylla Meghalaya sha ka National Senior Level ha ka 28 tarik u Nohprah 2022 ka ban pynkut ruh ha ka 6 tarik u Kyllalyngkot 2023 kaba yn pynlong ha Nongbah Delhi.
Ha katei ka jingïalehkai kaba dei ruh ka lympung kaba heh bha jong ka jylla, la wan ban ïashimbynta naduh na West Jaiñtia, East Jaiñtia, South Garo Hills, West Garo Hills, East Khasi Hills, Eastern West Khasi Hills bad na West Khasi Hills District bad kiwei kiwei. Ki nong ïashimbynta ki kynthup naduh ki khynnah skul, ki ophisar, ki Nonghikai skul, College, ki Doctor bad kiwei kiwei.