Sdang ka Meghalaya da ka nam jop ha ka Subroto Cup, da 4-0 pynliem ïa ka MP

Shillong, Risaw 03 : Ka Meghalaya ka la sdang ka jingïaid lynti jong ka ha ka Subroto Mukherjee Cup da ka nam jop ha ka kyrdan U-17 ki shynrang da kaba pynliem da 4-0 kol pyrshah ïa ka Madhya Pradesh ha ka jingïalehkai ha ka sngi Nyngkong ha New Delhi.
Ka St. Anthony’s Higer Secondary School kadei kaba la mihkhmat ïa ka jylla Meghalaya ha katei ka lympung. Ka Meghalaya ka don ha ka Pool H ha ryngkat ka Sainik School bad ka Goa.
Haba phai sha ka jingïalehkai ha katei ka sngi, ki rangïalehkai ka Meghalaya ki la lah ban ïalehkai bha naduh kaba sdang ha kaba ka la ñion naphang sha ka kut jong ka Madhya Pradesh. Bad dei ha ka minit ba 30 u Blanangshngaiñ Khongsdam u la plie pyrda nyngkong na bynta ka Meghalaya ha kaba haduh ba kut ka kylla step, ka Meghalaya ka la lamkhmat da 1-0 kol.
Haba wanphai sha ka kylla miet, ka Meghalaya ka khlem ailad bad tur beit naphang sha ka kut bad da katei ka rukom ïalehkai u Blanangshngaiñ Khongsdam u la thep sa ïa ka kol kaba ar bad kaba lai na bynta ka Meghalaya.
Ka kynhun ki rangïalehkai ka Madhya Pradesh watla ki la ïakhun tyngeh hynrei ki khlem lah pat ban pyndep ha ka liang ka thep kol kaba la nang ai mynsiem shuh shuh ïa ki rangïalehkai ka jylla. Ha ka jingïalehkai jong ka minit ba 62 ka Meghalaya ka la ïoh sa shi kol ba la thep da u Rimankhraw Kharumnuid ha kaba ka Meghalaya ka la lah ban teh lakam haduh kaba kut jong ka jingïalehkai bad jop suk da 4-0 kol.
Ka Meghalaya kan ïakhun pat pyrshah ïa ka Sainik School ha ka sngi ba ar (4-9-2022).
Kum ban pynkynmaw hangne ba ka kynhun U-14 ki shynrang bad U-17 ki kynthei ki la rung sha ka quarterfinal hynrei ki la shah rem noh. Ka Subroto Cup ka la wanphai biang ha u 2022 hadien ar snem ba ym shym la ïoh ban pynïalehkai na ka daw ka pynthut ka khlam jingpang Covid-19. Ka Meghalaya kadei ka lahduh jong ka kyrdan U-17 jong katei ka lympung lyngba ka H Elias Memorial Higher Secondary School kaba la mihkhmat ïa ka jylla ha u snem 2019.