Hato yn hun ki paidbah ha ka jingpynbeit pud ha ka bynta kaba ar ?

0

Tang hadien katto katne bnai ba ka sorkar Meghalaya bad Assam kala pyndep ïa ka jingpynbeit pud ha ka sien ba nyngkong, ha kaba 2 ngut ki Myntri Rangbah jong ka Jylla Meghalaya bad Assam kila dep ruh ban soi ïa ka MoU hakhmat u Amit Shah myntri ka kam pohïing ka Ri, ki 2 ngut ki Myntri Rangbah jong ka jylla Meghalaya bad Assam u Conrad Sangma bad Himanta Biswa Sharma mynta ka sngi ki la ïakynduh biang ha Secretariat ka Assam ha nongbah Guwahati ban sdang biang ban ïakren bad pynbeit na ka bynta ka jingpynbeit pud haka wat Ba Ar haki 6 tylli ki jaka kajia pud ka Meghalaya bad Assam ba kynthup ïaka Block I, Block II, Psiar, Khanduli, Borduar, Mawtamur, Langpih kiba dei ki jaka ba hap ha ki 3 tylli ki district jong ka jylla.
Ïa katei ka jingïakynduh jong ki 2 ngut ki Myntri Rangbah ka jylla Meghalaya bad Assam ha ka sngi U Blei ha Janata Bhawan, Assam haka jingdonlang ruh ki Chief Secretary jong ki 2 jylla bad kiwei kiwei ki heh ophisar ha kaba la mynjur lang ban thaw noh biang ia ki Regional Committee.
Ka sorkar Meghalaya kaladep ban thung ïa ki Regional Committee na ka bynta ban pynkhreh ïa ka jingïakren pynbeit pud ha ka bynta kaba ar. Kine ki Regional Committee kin long ha ki khappud jong ka West Khasi Hills bad ka Assam, ha kaba ïa kane ka Committee ha kane ka thaiñ yn khlieh da u Bah Renikton Lyngdoh Tongkhar bad ki dkhot kin long u Bah Macmillan Byrsat, MLA Nongstoiñ, u MLA ka Rambrai-Jyrngam, Bah Kimfa S. Marbaniang, u Deputy Chief Executive Member (CEM)u Bah Gigur Myrthong bad u MDC Bah Bajop Pyngrope. U Deputy Commissioner, West Khasi Hills District, un long u Member Secretary.
Kawei pat ka Committee kadei na ka bynta ka RiBhoi District ban khlieh da u Bah Prestone Tynsong bad ki dkhot ki long u Bah Dasakhiat Lamare, MLA Mawhati bad Myntri ka Sorkar jylla, Nangta u MLA ka Nongpoh, u Bah Mayralborn Syiem, u MLA ka Jirang, u Bah S. Sohtun, u Executive Member ka KHADC Bah Jambor War, ki arngut ki MDC, u Bah Rangkynsai Kharbuki bad u Bah Vioctor Rani. U Deputy Commissioner, Ri-Bhoi District u long u Member Convenor.
Kawei pat kadei na ka bynta ka Jaiñtia Hills ban khlieh da u Bah Sngiawbhalang Dhar. Ki dkhot ki long u Myntri kam pohïing, Bah Lahkmen Rymbui, u Bah Comingone Ymbon, Bah Nujorki Sungoh, ki MLA bad kumjuh ruh u CEM ka JHADC, u Bah Thombor Shiwat. U Deputy Commissioner West Jaiñtia Hills un long u Convener.
Ka jingïapynbeit pud ha ka bynta kaba nyngkong, wat lada ha kaba sdang ka la ïoh ïa ka jingïaroh na kiba bun ki liang, hynrei hadien ba la lap ba ki don ki jaka ne ki shnong na Meghalaya kiba la shah pynhap jubor sha ka Assam, ka la mih ka jingpyrshah kaba jur na baroh ki liang, kat haduh ba ka sorkar MDA ka la shah kynnoh ba kadei ka sorkar kaba lilam ïa ki jaka jong ka jylla sha Assam. Ka jingpyrshah kam dei tang na ki Seng bad ki Kynhun, hynrei ka jingpyrshah ka long na ki trai shnong na ki jaka kiba la shah pynhap sha Assam.
Wat haduh mynta ruh hadien ba la sdang ka jingïakren jong ka jingïapynbeit pud kaba ar ruh, ki Seng bad ki paidbah ki dang pyrshah ïa ka MoU jong ka jingïapynbeit pud ha ka bynta kaba nyngkong. Ki Sengbhalang na Garo Hills, ki la wan kiew sha ka Shillong ha ka sngi Nynglong ban shong ïakhih ban pyrshah ïa ka jingpynbeit pud kaba ladep. La kyrshan lang ïa kane ka jingïakhih da ki Seng bad ki Kynhun na Khasi Jaiñtia Hills. Kane ka jingmih ban ïapyrshah ïa ka MoU- 1, kan buh ïa ka sorkar Meghalaya ka lynti kaba khim bha, namar ka bynta kaba ar ka kynthup ïa ki jaka kiba long sensitive bha lane kiba kham eh lane kiba ki paidbah ki peit khmat bha. Kine ki jaka ki long ka Block I, Block II bad ka Langpih. Naduh ki snem kiba ladep, tang shu la mih kino kino ki jingleh bor ka Assam ha kine ki ar tylli ki jaka, ka jylla baroh kawei ka khih beit puk.
Kumta ka long kaba donkam bha ba ka sorkar Meghalaya kan ïaid da ka lynti kaba sani bad peitsiar bha ha kane ka jingïapynbeit pud ha ka bynta kaba ar. Kam dei ban shu leh kyrkieh namar ba ka la jan artad ka elekshon, hynrei kan hap ban pyrkhat bha na ka bynta ka lawei jong ka jylla bad khamtam eh kan hap ban pyrkhat bunsien bha ïa ki jingmih lada don kano kano ka rai kaba ktah ïa ka jingsngew jong ki paidbah na kine ki artylli ki jaka ne na ki paidbah jong ka jylla hi baroh kawei.

Leave A Reply

Your email address will not be published.