Sdang ka Laitkor ïa ka SSA Women’s League da kaba pynliem ïa ka PFR FA

Shillong, Nohprah 11: Ki thei ïalehkai phutbol jong ka Laiktkor SC ki la sdang ïa ka samoi lehkai ha ka lympung Shillong Sports Association Women’s Football League 2024 da ka namjop kaba shongkun, ha kaba ka la pynjemkhnap ïa ka PFR Football Academy haduh 7-0 kol.
Ka Sanfida Nongrum ka la long ka namtam ha kane ka jingïalehkai da kaba thep marwei haduh saw kol kaba la ai mynsiem ïa ka kynhun ban khur ïa ka namjop. ka Sanfida ka la ïoh ïa ka hat trik hapoh ka kylla step lyngba ki kol ha ka minit kaba 5, 19 bad 34, nangta ka kol kaba saw ka la thep ha ka minit ba 50.
Kiwei pat ki kol na ka Laitkor ki la wan lyngba ka Tracy Rympei (6’minit) bad ka Daiamon Makroh (27′, 65′) kaba la thep ar kol.
Kumban shu kdew, mynta u snem ki don 10 tylli ki kynhun kiba la phiah ha ki ar tylli ki Group (A bad B), ha kaba la duna noh ar tylli naki 12 kynhun kiba ïakhun ha u snem 2023.
Ka Group A ka kynthup ïa ka Pay For Right Academy, Laitkor SC, Madanrting SC, Kharang SC bad ka Mawpat SC. Katba ka Group B ka kynthup ïa ka Rangdajied United FC, Lumparing SC, Smit SC, Nongrim Hills SC bad ka New Challengers.
Ha kane ka sngi Palei kin don lai tylli ki jingïalehkai, hapdengha kaba ka Rangdajied United FC kan ïakhun pyrshah ïa ka Lumparing SC, ha ka por 10 baje mynstep, bud sa ka jingïakhun jong ka Madanrting SC pyrshah ïa ka Kharang SC, ha ka por 12:15 baje mynsngi, bad khadduh hapdeng ka Smit SC pyrshah ïa ka Nongrim Hills SC, por 2 shiteng mynsngi, ha madan First Ground-SSA Stadium, Polo.