Shillong, Naitung 02: Ka jingïalang kaba saw sngi hapdeng ki shipai BSF na ka kynhun Frontier kaba don ïa ka jaka treikam ha Shllong bad ka kynhun shipai BGB jong ka Bangladesh ïa kaba la tip kum ka “Region Commanders BGB Level Border Co-Ordination Conference” ka la sdang ha Shillong.
Ïa kum kane ka jingïalang la juh pynlong shisien shisnem hapdeng kin ar kynhun ki shipai kiba pahara ha khappud ba kumno ban peit ïa u pud u sam bad ban pynthikna ba kan nym don ka khaïi beaiñ ha khappud hapdeng ka India bad ka Bangladesh.
Ïa ka kynhun BGB kaba la wan na Bangladesh la pdiang burom da ki heh BSF ha ICP ha Dawki bad la ïalam ïa ki sha Umpling jaka ba don ki BSF, ha Shillong ba kin don ha kane ka jingïalang kaba saw sngi lynter.
Kane ka kynhun BGB ka kynthrup ïa ki 13 ngut ki kynhun ba la ïalam da u Md Shazedur Rahman, Additional Director General, Region Commander jong ka, katba na ka liang jong ka India la lamkhmat da u Patel Piyush Purusottam Das, IPS IG BSF Tripura Frontier bad 12 ngut kiwei pat kiba dei na Meghalaya, Silchar bad Tripura Frontiers jong ki BSF.
Ha kane ka jingïakren la donlang ruh ki nongmihkhmat na ka tnat kam Pohïing ka sorkar pdeng, ka tnat kam bar ri bad na ka NCB ruh ki la ïadonlang ha kane ka jingïalang, kane ka jingïalang kan kut ha ka sngi Palei ka 4/Naitung/2024, ïa ka jingïalang yn pynkut da ka jingïasoi ïa ki soskular.
