Saitsohpen-Sohra, ïaïong 11: Ka East Khasi Hills Cricket Association [EKHCA] ha ka 11 tarik ïaïong, 2025 (sngi Thohdieng) ka la ïoh ban sdang ïa ka (L) Benjamin Diengdoh Memorial Under 16 Boys Inter School cum Cluster Cricket Tournament 2025 ha madan Pynshadkhurai Ground, Saitsohpen, Sohra.
Ha ka sngi sdang (Day:1) la ïoh ban pyndep ïa ar tylli ki jingïalehkai, ha kaba ka Sohra Cluster (A) bad ka Pongtung Cluster ki la khur ïa ka jingjop ha la ki jong ki jingïakhun. Ka Sohra Cluster (A) ka la pynliem ïa ka Sohra Cluster (B) da 5 wiket katba ka Pongtung Cluster ka la jop da 3 wiket ïa ka Mawsynram Cluster.
Hadien ba jop ïa ka jingkynting pisa (toss) ka Sohra Cluster (A) ka la aiti ïa ka Sohra Cluster (B) ban tied nyngkong kaba la lah ban kamai 43/7 haki 15 ober. U Arky Iangjuh u la kamai 12 ron naki 22 bol. U Henzil Kharpuri u la khur 3/2 naki 2 ober.
Ka la donkam tang 6 ober ïa ka Sohra Cluster (A) ban kynjoh 44 ron ba ka donkam da kaba hap 5 wiket. U Samborlang Lyngdoh u la kamai 5 ron naki 3 bol. U Guiding Sohkhlet u la khur 2/13 naki 2 ober. ïa ka nam Player of the Match la khur da u Henzil Kharpuri.
Ha ka jingïalehkai kaba bud, ka Pongtung Cluster ka la jied ban bowl nyngkong bad na ka liang jong ka Mawsynram Cluster ka la lah ban kamai 76/7 haki 15 ober, u Mekhraw Pathaw u la noh synñiang 19 ron naki 32 bol. U Jebenti Lyngdoh u la khur 3/17 haki 3 ober.
Ka Pongtung Cluster ka la lah ban pyndep ïa ka kamram da kaba kynjoh 77/7 thik ha ki 15 ober bad uba la lamkhmat ha ka tied dei u Mewanshailang Khongmawlong da kaba kamai 26 ron naki 35 bol. ïa ka nam Player of the Match la khur da u Jebenti Lyngdoh.
