Sar ka jingpang khmat ha Ri-Bhoi, bun kiba sdang saw bad at khmat kynthup ki khynnah skul

Nongpoh, Nailar 13: Ka jingpang saw ki khmat bala tip kum ka Conjunctivitis ka la sdang ban sar ha ki bynta jong ki shnong ha Ri-Bhoi District, ha kaba bun naki paidbah kila sdang ban ïoh ïa katei ka jait jingpang kaba lah ruh ban ïa bit na uwei u briew sha uwei pat.
Kumba la ïoh jingtip da u nongthoh khubor kila don bun ngut ki paidbah kiba la sdang ban ïoh ïa katei ka jait jingpang, ha kaba kila don ruh ki khynnah skul bad bun naki paidbah kum ka jingïada ïalade ki hap ruh ban pyndonkam da ki ïitkhmat ïong ban ïada bad lait naka jingïabit na uwei sha uwei pat, bala suba ba kadei naka jinglong jingman ka suiñbneng.
Ka katei ka jingpang ka sdang ban sar sha ki paidbah, kumba la ju leh haki snem bala dep ban lait naka khlam Covid-19 ki paidbah ki hap ban deng da ki mask, hynrei mynta da ki ïit khmat ïong.
Katkum ka jingïathuh jong katto katne ngut kiba ngat ha katei ka jingpang kila ïathuh ba ka don ka jingdaitbuid ha ki pyllew khmat kaba pynlong ruh ïa ki ban at bad saw riang bad sop eitmat ha ka por mynstep.
Kum ban shu pynpaw hangne ba ka sorkar Assam kala khang khyrdep ruh katto katne tylli ki skul ha Assam namar ka jingsar katei ka jingpang ban lait naka jingïabit na uwei u briew sha uwei pat khamtam ki khynnah skul.
Hynrei kumba long haduh mynta naka liang ka tnad ka koit ka khiah haka jylla kam pat pynmih lane ai kano kano ka jingpynbna sha ki paidbah ban ïada lane kumno ban leh ban lait naka jingïabit jong katei ka jait jingpang, hynrei kum ki paidbah kim dei ban kheiñ sting hynrei ban leit sha ki jaka sumar haba ïoh kum katei ka jingpang.