Shillong, Risaw 18: U Myntri ka tnat Soil and Water Conservation, PHE, Housing, etc. u Marcuise N Marak, ha ka sngi Thohdieng u la sam ïa ki cheque sha ki nongrep jong ka C& RD Block jong ka East Garo Hills, kiba kynthup ïa ka Samanda, Songsak bad Dambo-Rongjeng kiba hab hapoh ka FOCUS program ha jingdonlang u Deputy Commissioner, Vibhor Aggarwal, Ripamchi N Sangma, ADC, bad ki BDO, ki ophisar na ki tnat bapher bapher bad kiwei kiba la shah khot sngewbha bad ïa kine ki cheque la sam ha DC Park, Williamnagar.
Haba kren ha ka jingïalang, u Marcuise u la pyntip ba ka sorkar jylla ka la ai kine ki lad jingïarap pisa sha ki nongrep naba ka kam kaba nyngkong eh kaba ki briew ha kane ka jylla ki leh ka dei ka kam rep kam riang bad kane ruh kadei ka jingangnud jong u Myntri Rangbah ka jylla ban pynlong ïa ka jylla ba kan kynjoh sha ka thong jong ka ïoh ka kot kaban kynjoh sha ka 10 billion dollar economy.
U la ong ba ka sorkar kan sdang ïa ki sienjam ban kyntiew ïa ka bha ka miat jong ki nongrep bad kumjuh ruh ki producer group ha kaba kane kan kyntiew ïa ka ïoh ka kot jong ki. Haba ïathuh shaphang ki scheme bad ki project jong ka sorkar jylla kaba thmu ban kyntiew ïa ka rep ka riang ha ka jylla, u la kyntu ïa ki nongrep bad ki producer group ban pyndonkam bha ïa ka pisa ba na ka sorkar khnang ban lah ban pynurlong ïa kane ka jingthmu jong u Myntri Rangbah ka jylla.
Ha kane ka prokram na ka liang ADC, Ripamchi N Sangma, haba ïathuh shaphang kane ka jingthmu, la pyntip ba ka sorkar jylla ka la ai kine ki lad jingïarap sha ki 464 tylli ki producer group kaba hab hapoh ka FOCUS program ha East Garo Hills hadien ka jingïohi ba ka la don ka jingkiew ha ka rep ka riang ha kane ka district.
Ha kane ka sngi na ka liang jong u Myntri u la sam ruh ïa ki guide book sha ki skul kiba don hapoh ka Williamnagar kaba dei ruh hapoh ka CM Impact Program. Ha shwa kane la ïoh ka jingkren pdiang na District Program Manager ka MBMA, Williamnagar, Lisbeth A Sangma, bad ki kyntien khublei na Janisa Marak.
