Shillong, Naiwieng 1 : U Myntri Rangbah ka jylla mynta ka sngi ula sam jingïarap da ka pisa, sniang, mashin, ka jingai ram ba khlem siew sut bad kiwei kiwei ki tiar sha ki paid nongrep ha Paham, Demdema khnang ba kin lah ban kamai bad ïeng hala ki jong ki kjat ban bsa bad pyndap ïa ka ïing ka sem.
U Myntri Rangbah ula sam kumba 9.77 lak lyngba ka FOCUS + sha ki 977 ki Producer Group. ïa ka FOCUS + la pyntreikam ban ïarap ïaki Producer Group ba kin ïatrei lang ban kyntiew ïa ka jingïoh nong jongki ha baroh kawei ka jylla. Kane ka dei ka prokram kaba heh bha ba la pyntreikam da ka sorkar na ka bynta ki paid nongrep.Namar lyngba kane kin pynkhlaiñ ïaka rep ka riang ban mih bun ki mar rep bad ban die ruh sha ki iew ki hat. Na ka bynta kawei kawei ka kynhun la ïarap mar 10, 000 tyngka. Nalor kane la sam ruh ïa 1800 tylli ki khun sniang sha ki 450 ki nongrep kiba la ïoh mar lai tylli ki khun sniang kynthei bad uwei u khun sniang shynrang. Kane ka long lyngba ka Rural Backyard Piggery Scheme, Progress. Ka thong lyngba kane ka long ba da kaba ri ïa kine ki khun sniang kin nang kha roi bad ki nongrep kin sa ïoh nong na kaba die ïaki khun sniang.Kane ka skhim kan ai jingmyntoi ïa kumba 10,000 ngut ki nongri jingri bad lyngba kane kan kyntiew ruh ïa ka jingpynmih ïaka dohsniang ha ka jylla Meghalaya.
Nalor kane la sam ruh 1.40 lak tyngka sha ki 4 tylli ki kynhun jong ki Samla lyngba ka skim YESS bad kane ka skim ka dei ban ïarap ïa ki samla ha ki kam ban kyntiew ïa ka jingïalehkai sport.
Nalor kane ula sam ruh mar 10,000 tyngka sha ki 10 ngut ki nongthaiñ jaiñ jongka Muktidata Multi Purpose Cooperative Society da kaba ïatrei lang bad ka Meghalaya Basin Development Authority.
U la sam ruh ïa ki kor suh jaiñ sha ki 15 ngut ki samla ba la dep pyntbit na ka Tribal Attire. Ula sam ruh ïa ki tiar Solar sha ki 15 tylli ki Solar Technician na ka skhim MSSDS.
Haba kren ha ka jingïalang u Myntri Rangbah u la ong ka jylla Meghalaya ka dei ka jylla kaba dang bun kiba im ha ka rep ka riang kumta ban kyntiew ïa ka ioh ka kot ha ki thaiñ nongkyndong ka dei ka thong jongka sorkar. Ha kine ki sawsnem tam ka sorkar ka la pyrshang ban pyntreikam bun ki prokram bad ki mission ban wanrah ka jingkylla ha ki nongrep da kaba sam ïa kine ki jingïarap.
