Shillong, Naiwieng, 01: U nongtrei mon sngewbha u Bah Joannes JTL Lamare na ka shnong Kynton-U-Mon, Nongkrem,
East Khasi Hills District ha ka sngi Baar u la pynher da ka jingthoh sha u Myntri ka tnat Kam Pohing u Amit Shah da ka jingkyrpad ban tuklar lem halor ka jingpynjari ïa ka Section 144 CrPC da ki bor synshar ka East Khasi Hills District ha nongbah Shillong.
Ha kane ka shithi, u Bah Lamare u la ong ba katkum ka huku, la mana ban ïalum briew shi jaka naba kan pynmih kano kano ka jingkulmar. “Ka jingpynjari ïa ka Section 144 CrPC ha nongbah Shillong, Meghalaya ka long tang ban khanglad ïa ka hok jong ki nongshong shnong ka jylla Meghalaya,” u la ong.
“Lah ban kdew hangne ba ka jingbym hun jong ki paidbah pyrshah ïa ki polisti treikam jong ka Sorkar la sakhi ha kaba ki paidbah ki la mih sha surok manla ka por. Bun ki jingïakhih ba la pynlong da ki kynhun bapher bapher jong ki nonghikai, ki nongtrei Sorkar, ki kynhun sengbhalang bad kiwei kiwei ki la ïoh jingkyrshan bha hynrei ka Sorkar kam shym la pynjari ïa ka Section 144 CrPC ban khanglad ïa ki nongshong shnong ban pynsngew ïa ki hok jong ki,” u la ong.
U la kdew ruh ba katkum ka hukum ba la pynmih da ka Ïingbishar Supreme Court ka ri India ha ka 10 tarik, Kyllalyngkot, 2020 ka la kdew katto katne ki mat ha kaba ïadei bad ka jingpynjari ïa ka Section 144 jong ka Code of Criminal Procedure (CrPC), 1973.
“Ka Ïingbishar Supreme Court ka ri India ka la kdew ruh ïa ki jingpyrkhing haba pynjari ïa ka Section 1044 da kaba ai ruh bad ki nuksa bad yn ym lah satia ban pynjari ïa ka Section 144 ban khñiot ïa ka jingpynpaw ïa ka jingsngew lane ka jingeh, lane ban pynpaw dawa ïa la ka hok, la kdew u Bah Lamare ha ka shithi ba la phah sha u Shah
U la kdew ba katkum ki mat ba la kdew da ka Ïingbishar Supreme Court ka ri India, la shem ba la shu knieh noh ïa ka hok jong ki nongshong shnong bad kaba long ruh kum ka jingpynkheiñ ïa ka hok ba la aibor da ka riti synshar namarba ka hap hapoh ka Article 19 (2) jong ka riti synshar ka ri India.
“Namarkata, nga kyrpad ïa ka Ministry jong phi ban shimkhia halor kane ka kam khnang ban pynthikna ba ki paidbah ka jylla Meghalaya kn ym shah pynduh noh ïa ka hok jong,” ong u Bah Lamare.
