Ka Sorkar MDA ka pyndonkam ïa ka IBDLP na ka bynta ka jingmyntoi shimet: Mukul Sangma

0

Shillong, Naiwieng, 01: U Nongïalam ka Liang Pyrshah u Dr. Mukul Sangma ha ka sngi Baar u la kynnoh ba ka Sorkar MDA ba ïalam da ka National Peoples Party (NPP) ka la pynlong ïa ka Integrated Basin Development and Livelihood Promotion (IBDLP) tang kum ka jingmyntoi shimet jongno re jongno.
U la ong ba ka jingmih khubor shaphang ka IBDLP ka la pynsngewkhia haduh katta katta, ong u Dr. Mukul uba long ruh u nongïalam jong ka Trinamool Congress Legislature Party (TCLP) haba kren ha ka jingïalang jong ka TMC kaba la long ha ka shnong Mawryngkneng.
“Ka Sorkar MDA ka la pyrshang katba lah ban pynlong ktem khaii ïa ka Basin Development Programme nalor ba kam lah wat tang ban pyntyllun ïa ki prokram ha kaba bun ki jingduna ki don katkum kaba paw ha ki lad pathai khubor. Nga kyndit ban ïohi ba ki la pyrshang ban pynlong ïa ka Basin Development Programme na ka bynta ka jingmyntoi shimet. Ki khubor kiba la mih ki pynsngewkhia bha haduh katta katta,” u la ong.
Haba kynthah ïa ka jingpyrshang ïalam bakla jong ka Sorkar ban shu pynksan jubor shaphang Jal Jeevan Mission project tang ban myntoi ha ka saiñpyrthei, u Dr. Mukul u la ong, ‘nga la shah buh jingkylli kumno ka Sorkar ka ïoh pdiang ïa ka khusnam Best Performer na ka bynta ka JJM? Ka lah ban long ba ka Sorkar MDA ka la shukor ïa ka Sorkar India. Manla ka por hashwa ka elekshon, ka Sorkar MDA ka ju mlien ban shukor sha ki paidbah tang ban ïoh jingmyntoi ha ka saiñpyrthei.”
Ha kane ka jingïalang, la don lang u State President ka TMC u Bah Charles Pyngrope, u MLA ka Party u Bah George B. Lyngdoh, u Vice President ka TMC u Bah James Lyngdoh, u nongïalam ka TMC na Mawryngkneng Constituency u Bah Banshanlang Lawai, u nongïalam ka TMC Youth Wing u Samla Bansharailang Pyngrope bad u Bah Fernandez S. Dkhar bad kiwei kiwei.

Leave A Reply

Your email address will not be published.