Dawa ka HNYM ban pyntreikam ïa ka State Employment Policy bad bhah 80% ki kam ïa ki trai muluk

Shillong, Naiwieng 01: Ka Hynniewtrep National Youth Movement (HNYM) ha ka sngi ba-ar ka la pynbna paidbbah ba kan pynlong ïa ka jingïakhih shong kyllaiñ myngngor hakhmat Secretariat naduh ka 4 tarik mynta u bnai ban dawa ba ka sorkar kan wanrah da ka State Employment Policy bad ba kan wanrah da ka aiñ ba ki kam ha ki private sector dei ban bhah 80% na bynta ki trai muluk.
Haba kren sha ki lad pathai khubor, u Bah Louis Dohtdong u Presideent ka seng u la ong ba kane ka sienjam jong ka seng ka long hadien ba ka por kaba ki la ai sha ka sorkar ka la kut ha ka 30 tarik Risaw. U la ïathuh ruh ba ha ka 20 tarik Risaw ki la dep ban phah jingthoh sha ka sorkar halor kane hynrei na ka liang ka sorkar kat haduh mynta kam shym la pynphai ktien eiei.
“Kane ka jingleh kyllut ka sorkar ïa ka jingdawa thaw noh ïa ka State Employnent Policy bad ka aiñ ba ki Private Sector kin thungkam haduh 80% ïa ki samla trai jylla ka la pyndom ïa ki samla bad dei namar kane na ka liang ka seng naduh 4 tarik kan shong kyllaiñ myngngor ha khyrdop Secretariat”, ong u Bah Louis.
U la ïathuh ruh ba ka seng kan bteng biang ïa kane ka jingïakhih ha ka 7 tarik namar ki ophis sorkar ki ïoh shuti ha ka 5 bad 6 tarik namar ka dei ka sngi saitjaiñ bad ka sngi u Blei
“Ka seng kan sa bteng biang ïa ka jingïakhih ha ka 7 tarik kaba dei ka sngi nyngkong bad ha kane ka sngi ki dkhot jong ka seng kin wan shim bynta lang namar ha kane ka sngi u Amit Shah u Myntri Korbar ri ka sorkar pdeng ruh un wan iuh kjat ha Shillong bad da kane ngi kwah ban pyni ba kane ka sorkar u Conrad ka la shukor ïa ki samla ka jylla namar wat hadien ba ngi la pan por ba ngin ïoh leit ïa kynduh bad u ruh ym shym la patiaw eiei”, u la ong.
Haba ïadei bad ka jingpynjari ka Deputy Commissioner ïa ka kyndon 144 CrPC ban khanglad ïa ka jingïalum briew bad ban pynlong jingïalang ha ki jaka ba hap ha ki bynta ka Shillong Urban Agglomeration, u Bah Louis u la ong ba lada ka sorkar kam khein snep ïa ka jingdawa ki khun samla, ka seng ruh kam kheiñ snep ïa ka aiñ, jong ka DC lane ka sorkar.