Ba bun ki bar jylla ba wan pan jingïarap, kyntu ka KSU Mawprem ban husiar ki paidbah

Shillong, Naiwieng, 01: Ka Khasi Students’ Union Mawprem Unit, ka la kyntu ïa ki paidbah ka bri Hynñiewtrep ba ki dei ban long kiba husiar bha haba leh ïa kino kino ki kam leh isynnei ïano ïano, namar don ki kynhun ki bar jylla ba wan lum pisa pan jingïarap.
Ka KSU Mawprem Unit hadien ba ka la thwet ïa ki bar jylla kiba lum pisa na ka por sha ka por hapoh shnong Mawprem bad ha kane ka 29 tarik Risaw, 2022 ka la ïoh bat ïa u wei u bar jylla wan lum pisa biang na ki nongshong shnong ka thaiñ Mawprem da kaba shu sam ïa ki kot appeal sha ki Paidbah kaba ong ba u dei u briew bym nangkren, u ba kyllut u bym ïoh sngew, ka kmie ba ïap na ka daw ba shah puid por ba kha ïa ki khun ba don artylli khlieh bad u kha ba ïap na ka daw ba shah bat electric bad kumta ter ter.
“Ha kane ka sien ruh kiba bun na ki paradoh para snam da ka jinglui lui ki la synnïang pisa sha une u bar jylla, khlem da kylli khlem da tohkit bha ban wad ïa ka jingshisha. Marsien ïoh jingtip ka seng mardor ka la pyrshang ban thwet ïa une u briew bad ka lah ïoh ban bat ïa une u bar jylla bad ka lah peit ïa ki kot ki sla bad ka shem ba bun na kine ki kot ki sla kidei kiba u shu shna hi namarba ha ka Adhaar bad dur thep vote ka kyrteng bad ka dur jong une u briew ka ïapher. Kumta mar-mar khlem da pynslem ka seng ka pyntip sha ki bor shnong bad hadien la aiti noh ha ki ki pulit ka Lumdiemgjri Police Station”, ong ka kyrwoh na Samla Pynshngaiñ Lyngdoh General Secretary jong ka KSU Mawprem Unit.
“Ki paidbah ki dei ruh ban kynmaw ïa kaei kaba la dep jia ha Smit ha kaba u bar jylla uba leh mynleh kum u nongdie tiar u dei pynban u nonglute. Ha kane kynti ruh, ñiuma kum une u briew ba wan lum pisa pan jingïarap na ki paidbah kane ka dong ka thaiñ da kaba leit rung na kawei ka thliew iing sha kawei pat u lah ban dei pynban u nonglute ynda u la ïoh ïa ki lad ki kabu kiba biang” pynkut ka kyrwoh.