Shillong, Jylliew 17 : Ka prokram sam syrnot ïa ka kynhun kaba 105 jong ki shah hikai computer bad ka kynhun kaba 43 jong ki shah hikai ka ktien ka thylliej jong ka Ramakrishna Mission Vivekananda Cultural Centre ka dei kaba la pynlong ha ka Vivekananda Cultural Centre, Quinton Road, Shillong ha ka sngi Saitjaiñ mynta u bnai.
Khnang ban ai bynta lang ïa palat ar hajar ngut kiba shah hikai, la pynlong ïa kane ka prokram ha ar bynta, kawei ha ka por mynstep bad kawei pat ha ka por nohphaisngi. Ha kane ka prokram, la sam 1640 tylli ki syrnot sha ki khynnah kiba la pyndep ïa ki jinghikai computer bad ka ktien ka thylliej.
Ka Ramakrishna Mission, Shillong ka ai jinghikai ïa kumba 6000 ngut ki samla ha ka shi snem ha ki sobjek computer ha san tylli ki bynta ha ka shi snem. Kane ka jingpynkup burom ka dei na ka bynta ki shah hikai ha ka bynta kaba la long naduh u ïaïong haduh Jylliew 2024 kaba long ka kynhun kaba 105 jong ki shah hikai kiba ïadon kumba 2200 ngut ki samla na kylleng ki jylla ka thaiñ shatei lammihngi.
Ki samla kiba la wan shakhmat duh ki long Computer-Beginner Nabin Rai; Intermediate- Sarmishta Barua; Tally Pt. I – Naphisabeth Jarain; Tally Pt. II Medarishisha Ryntathiang; DTP Pt. I Orison Lapang; Database-I Simran Khatun; Web I & DTP II Iarilang Lyngdoh Nonglait.
Kiba la dep ha ka Database-II, Web Designing-II bad Python Programming dei Bapyndapbor Wahlang; Data Entry Operator (DEO) Damiki Wann bad English Language & Communication Skills Abigali Mary June Langstieh. Ka Nikita Ghosh ka la ïoh ïa ka kor computer namar ka jingpyndep shibun ki jingai jinghikai bad ka jinglah jong ka ban leh bha ha baroh kine.
Ha ka jingai jingkren jong u, Swami Divyaswarupananda Maharaj, Assistant Secretary, Ramakrishna Mission, Shillong, u la kitbok kitrwiang ïa ki samla kiba la noh met bad mynsiem sha ka jingïoh ïa ka jingnang jingstad.
U Bah Aibanshngain Swer, Director Meghalaya Basin Development Authority ha ka jingai jingkren jong u kum u kongsan ha ka bynta kaba la pynlong mynstep u la ong ba watla ka Meghalaya ka riewspah ha ka deiriti bad ki jingdon jingem, bun na ki briew jong ka jylla ki dang duk namar kim lah ban pynïahab bad kane ka pyrthei ha kane ka juk kaba mynta.
U la ong ruh ba ka long kaba bha ba shibun ki samla na ki jaka nongkyndong ki wan sha kane ka jaka ai jinghikai ban kyntiew ïa ka jingnang jingstad lyngba ki sap ha ki kam computer kumba long sha kiwei kiwei ki bynta jong ka India.
U la ong ruh ba ki khynnah samla mynta ki la ngop ha ki jingbam kai watla ki tip ba kine kim tei ïa ka met bad kumta kumjuh, ki jingnang jingstad ha ki kam computer ruh kim dei ban shu sepei.
Ka Kong Silbi Passah, kongsan ha ka bynta kaba la long ha ka por nohphaisngi ka la ïaroh ïa ki samla kiba la wan ïoh jingnang jingstad ha ki kam computer bad ka la kyntu ïa ki samla ba kin bud ïa ki nuksa kiba bha bad pyrshang lut ïa ki lad ki lynti kiba mih namar kane ka dei ka por ïa ki ba kin pyrshang bad pyntreikam ïa kiei kiei kiba ki la nang.
Ka Sudipta Hore, Principal barim jong ka Laban Bengali Girls Higher Secondary School ka la ai ka jingkren ai jingsngewnguh bad ka la batai shaphang ka jingtrei shitom jong ki shah hikai bad ka la ïaroh ruh ïa ki nonghikai kiba la theh met bad mynsiem ban ai jinghikai ïa ki.
