Sahkut palat 70,000 tylli ki Ration Card ba aplai thymmai ha Meghalaya

Shillong, Nailar 03 : Ki la don palat 70,000 tylli ki card rashon ba aplai thymmai kiba dang sahkut haduh mynta ha ka jylla tang na ka daw ka jingsahteng ka sorkar pdeng ban lum ïa ka Khanasamari.
“Kane ka jingslem kadei ka dawbah kaba pynsahteng ïa ka sorkar jylla ban pynïaid shakhmat ïa ka kam kiba ïadei bad kine ki card rashon ba aplai thymmai ha ka jylla,” ong u Myntri ka tnad Food & Civil Supplies ka sorkar jylla, Bah Comingone Ymbon haba kren bad ki lad pathai khubor.
Shuh shuh u la ong ruh ba ïa mynta hi kim pat lah ban leh ei ei ïa kine ki 75,000 tylli kiba aplai thymmai ban ïoh ïa ka card rashon. “Ka kam kan ïaid tang hadien ba ka sorkar pdeng ka la dep ïa ka jinglum ïa ka khanasamari ïa kaba la sahkut noh ha u snem 2020 na ka daw ka jingwan ka khlam COVID,” u la ong.
Ha kajuh ka por u la ïathuh ba u la ïa kren bad ka sorkar pdeng halor kane ka bynta bad kumta u pynpaw ba ki khmih lynti ba ka jinglum ïa ka khanasamari kan bteng biang hadien ba la dep ka Dorbar jong ka Parliament.