Nongpoh, 09: Katto katne ngut ki samla wad kam pulit kiba la pyndep ruh ïaka jingmareh, ki eksamin bad ki jingdonkam baroh, kila pynpaw ka jingsngew bynñiaw bad sah haka umdum hadien ba kim shym la mih kyrteng haka result jong ka kam pulit bala pynbna dang shen da ka tnad pulit haka jylla.
Haba ïakren bad uwei naki samla u bym la kwah ban pynpaw kyrteng u la ong ba u dap da ka jingsngew lyngngoh kaba khraw ba um shym la mih kyrteng haka result kam pulit bala dep pynbna shen, wat haba u ioh ki marks kiba kham heh ban ïa kiba mih kyrteng bad shah jied haka interview haka post Driver Constable.
Naka liang utei u samla u la leit ruh ban pan jingshai naka tnad pulit ha kaba ïadei bad katei ka bynta ha kaba kila aidaw pynban ba u la heh ka rta, katba kitei kiba mih kyrteng ki dei kiba dang biang ka rta ha kaba ïadei bad ki Reserve Category jong ki Khasi bad Jaiñtia.
U la ong ruh ba kum u samla u ba la pyndep lut ïaki jingdonkam baroh, ka tnad pulit kala dei ban pynshai naduh katei ka por, ba kin nym pynlut kai ïaka por, ban leit mareh, ban khreh kot hynrei balei ki shu kyntait ban pynmih ïaka kyrteng kaba la pyntharai sniew pynban ïa ngi ki samla thep kam, watla ka rta ka dang biang haka por ba ki thep bad dei ka jingslem jong ka tnad pulit ban pynmih ïaka result.
Naka liang kitei ki samla ki kwah ruh ka jingshai ba pura naka tnad pulit balei ki kyntait ban pynmih kyrteng haba ki heh maki ki marks ban ïa kito kiba shah jied haka interview ka ba la rai ban pynlong haka 11 tarik mynta u bnai.
