SAFF U20 C’ship: Lyngba ka kol u Monirul, pynliem ka India ïa ka Bhutan

Patan (Nepal), Nailar 19: Ka kynhun India kaba la shah pynduna sha ka 9 ngut ki rangïalehkai ha ka 69 minit, ka la ïakhun shitom ban jop ïa ka jingïalehkai da 1-0 kol ïa ka Bhutan ban sdang ïa ka lynti ïaid jong ka da ka namjop na ka Group B ha ka SAFF U20 Championship ha ka jingïalehkai kaba la long ha ANFA Complex here ha ka Lah Sngi U Blei.
Hadien ba lamkhmat ïa ka jingïalehkai lyngba ka kol u Monirul Molla ha ka kylla step, ka India ka la khmihlynti ban synshar hi dalade ïa ka jingïakhun da kaba pynïar ïa ka rukom ïalehkai, hynrei ka jingïakynad kaba jur hapdeng ki player na baroh arliang ka la wanrah ïa lai tylli ki red card na u referee — ar ngut ki player ka India bad u wei jong ka Bhutan — kaba la wanrah jingkylla ïa ka jinglong jingman jong ka jingïakhun.
Watla shibun tylli ki jingpyrshang na ka Bhutan kaba la shim kabu ïa ka jingduna player ka liang pyrshah ban thaw ïa ki lad da kumno ban ïoh pynïakhaid, ka India ka la ïakhun shitom ban khanglad bad khur shalade ïa ki lai point point.
Haba phai sha ka jingïalehkai, lah ban kdew ba ka India ka la ïoh katto katne ki kabu ban pynsmiej ïa ka liang pyrshah, bad ka jingtbit jong u Kelvin Singh Taorem ban pynrung bol hapoh phyllaw kol ka la long ka jingma kaba khraw ïa ka Bhutan. Ha ka minit ba 14, u la pashat thikna ïa ka bol lyngba ka free-kick kaba la wanpoi ha u Thomas Cherian u ba la shu pyndei tiak da ka khlieh, hynrei phewse ka bol ka la lait sharud.
Khadduh ka India ka la pynurlong ïa ka kol na ka corner ba la shut da u Kelvin ha ka 37. U Monirul Molla u la lah ban kynthih kham shalor ban pyndei tiak ïa ka bol da ka khlieh ban thep ïa ka kol bad buh ïa ka kynhun hakhmat shuwa ban kut ka kylla step.
Kaba la wanrah jingkylla ïa ka jingïalehkai dei hadien ba u Kinley Gyeltshen ka Bhutan bad arngut ki player ka India – u Pramveer bad u Vanlalpeka Guite, ki la ïohpdiang da ka red card ha ka 69 minit.
Kane ka la ktah jur ïa ka India namar ka la hap ban ïakhun da tang 9 ngut ïa ka minit ba dang sah, katba ka Bhutan ka don 10 ngut. Watla kata ruh, ka India ka la lah ban khanglad ïa ka liang pyrshah ban khur shalade ïa ki lai point ba kongsan.
Ka kynhun kan pynkhreh mynta ban ïakhun ïa ka jingïalehkai kaba ar bad kaba khadduh na ka Group pyrshah ïa ka Maldives.