Shillong, Nailar 20 : Ka ïing Bishar District & Session, Shillong ka la hukum ban phah set phatok (judicial custody) 14 sngi ïa ki lai ngut ki nongïalam ka Khasi Students’ Union (KSU) hadien ba ki shah kem na ka jingmih ka huri hura ha ka rally thuk thuk hynnin ka sngi Balang.
Kine ki nongïalam ka KSU ba la ïalam tian bishar ki kynthup ïa u President samla Raymong Kharjana, Vice President samla Pynskhemlang Sanmiet bad u General Secretary samla Reuben Najiar.
Ka ïing Bishar ka la bthah ban set ïa baroh lai ngut ki nongialam ka KSU hapoh phatok ba 14 sngi.
Haba kren sha ki nongthoh khubor hadien ba mih na ïing Bishar, u General Secretary ka KSU samla Reuben Najiar ula kynnoh ba ka rai jong ka Sorkar ban kem ïa ki nongïalam ka dei ka jingpyrshang ban pyntlot ïa ka jingïakhih ka seng.
U samla Najiar ula ong ba ka KSU kan ym kynran dien bad kan ïai bteng ban pynbor ïa ka Sorkar ba kan pyntreikam ïa ki mat jingdawa ka seng.
