Sa tang khyndiat por yn kylluid noh war ka Khyndailad

Shillong, Naitung 31 : U Myntri ka tnad Tourism ka sorkar Jylla, Bah Paul Lyngdoh u la pyntip ba shen ka Khyndailad kan sa kylluid noh war hadien ba ki la dep ban pynkynriah noh sha kawei pat ka jaka ïa ki nongdie madan kiba ju die jingdie baroh shi katta ha kitei ki jaka.
Haba kren bad ki lad pathai khubor, u Myntri u la ong, “Hapoh ka 15tarik Nailar ngin sa lah ban leh ei ei, hynrei la katta ruh ngan sa kren biang bad u Symbud Myntri Rangbah ba dei peit ïa ka tnad Urban Affairs namar kadei ka tnad kaba hap ha ka jingpeit jong u.”
Shuh shuh u laong ruh ba kin pyntikna ba kano kano ka jingthmu pynkynriah jaka kumba la ïakren mynshwa kan ïaid beit. U ong ruh ba ïa kane ka kam kin sa lah ban ïohi dak ha kine ki khyndiat taiew ban wan.
U ong ruh ba kane ka sienjam ka long kaba donkam bha ban pynlong ïa ka Khyndailad kum kawei na ki jaka ïaid kjat bad ruh kum kawei na ki jaka ban don ki jaka put jaka tem ban pdiang burom ïa ki nongwan jngohkai pyrthei kiba wan kai sha Shillong.
Lah ban kdew hangne ba shipor ka la don ka jingkhih pyrshah na ki nongdie madan halor katei ka sienjam ban pynkynriah noh ïa ki na katei ka jaka sha kawei pat.
Katkum ka jingïathuh jong u, ka bynta kaba nyngkong ka long ban pynkynriah noh ïa ki nongdie madan bad kawei pat ka long ban ym shah ïaid kali shuh ha kito ki lynti kiba la mang tang ban ïaid kjat. La ong ruh ba ka thong ka long ban pynkylla noh ïa ka Khyndailad kum ka lynti ïaid kjat bad ruh kum ka jaka ban pdiang sngewbha ïa ki nongleit nongwan da ki sur jingrwai khamtam eh ïa ki nongwan jngohkai kiba wan na kylleng ki bynta jong ka pyrthei.