Shillong, Naiwieng 14 : Ka Sorkar Pdeng ha ka sngi Palei ka la pynjlan biang sa san snem ka jingkheiñ be-aiñ ïa ka Hynniewtrep National Liberation Council (HNLC) kaba dei ka kynhun kieng atiar na ka jylla.
Katkum ka jingpynbna (notification) ba la pynmih da ka tnad Kampohiing jong ka Ri ka la ong hadien ba ki la don bun ki kam beaiñ kiba mih ba la leh da ka HNLC ha ki por ba la dep, kumta ka sngew dei ban pynbna ba ka HNLC ryngkat ki kynhun treikam jong ka kum ka kynhun beaiñ bad ba kane kan treikam naduh ka 16tarik Naiwieng, 2024 na bynta ka san snem.
La ong ruh ba ka sorkar pdeng ka sngewdei ba namarba ka HNLC ka la leh shibun ki kam khamtam eh ban pyniakhlad ïa ki jaka ha Meghalaya kiba shong da ki Khasi bad Jaintia na ka ri India bad bteng ruh ïa ki kam thombor ïa ki nongshong shnong ban dawa pisa na ka bynta ka seng.
Ka Ministry ka la ong ruh ba ka HNLC ka la don ka jingïadei bad kiwei pat ki kynhun kaikhlaw jong ka thain shatei lam-mihngi jong ka ri ban leh ïa ki kam dawa pisa, ban pyntieng pynsmiej bad donkti ruh haduh 48 tylli ki kam bymman kynthup ïa kiwei ki jingjia pynbthei bom lane buh ïa ki tiar pynbthei ha ka jylla naduh ka 16tarik Naiwieng 2019 haduh u Jylliew 2024.
La ong ruh ba ha kine ka por, ki bor ba dei peit ki la ïoh ruh ban kem haduh 73 ngut ki dkhot jong ka bad lai ngut pat kiba pyndem wait.
La ong ruh ba ka sorkar Meghalaya ruh ka la ai jingmut na ka bynta ban kheiñ ïa ka HNLC kum ka kynhun beaiñ hapoh ka Unlawful Activities (Prevention) Act, 1967.
Katei ka jingpynbna ka ong ruh ba ka sorkar pdeng ka don ruh ka jingmut ba namar ba ki kam ba la kdew haneng jong ka HNLC ki long kiba ktah ïa ka jinglaitluid bad ka jinglong kawei jong ka ri India, bad lada ym lah ban tehlakam bad teh lakam mardor ïa kine, ka HNLC ka lah ban khie khlieh biang bad ban pynbun ïa ki dkhot, ban ïoh ïa ki tiar ïaleh bad ban wanrah ka jingduh ei ka jingim jong ki riew paidbah bad ki bor pahara bad ki jingdon jingem bad kumta ka pynstet ïa ki kam pyrshah ri jong ka.
“Ka Sorkar Pdeng ka don ruh ka jingmut ba namar ki daw ba la kdew haneng, ka long kaba donkam ban pynbna ïa ka HNLC ryngkat bad ki kynhun, ki tnat bad ki seng treikam jong ka, kum ka seng be-aiñ. Namarkata, da kaba pyndonkam ïa ka bor ba la pynkup da ka sub section (1) jong ka section 3 jong ka Unlawful Activities (Prevention) Act, 1967 (37 of 1967), ka Sorkar Pdeng ka pynbna ba ka Hynniewtrep National Liberation Council (HNLC), ryngkat bad baroh ki kynhun, ki tnat bad ki seng ba shakhmat jong ka kum ka seng kaba be-aiñ,” ka la ong shuh shuh.
