Shillong, K’Lyngkot 30 : Ka United Democratic Party ka la pynbna biang sa san ngut ki kyrtong na rilum Garo kiban aireng ha kane ka elekshon ban wan.
Haba pynbna ïa katei ka thup jong ki kyrtong, u President ka UDP, Bah Metbah Lyngdoh u la ong ba kitei ki kynthup ïa u Bipul Ch Sangma na Rangsakona constituency, nangta u Subankar Koch na Selsella constituency, u Julius T Sangma na Tikrikilla constituency, u Sushil Goyeri na Raksamgre bad ruh u Teseng A Sangma na Siju – Rongara constituency.
La ïathuh ruh ba kumba long haduh mynta, ka UDP ka la dep ban pynbna haduh 45 ngut ki kyrtong, ha kaba 15 ngut ki dei na rilum Garo bad 30 ngut pat na rilum Khasi – Jaiñtia.
Haba jubab halor ka jingkylli u President u la ong ruh, “Ïa mynta hi ngi dang bishar ïa ka kyrteng jong ki katto katne ngut ki kyrtong bad lehse ha ki shisngi arsngi ngin sa lah ban pynbna ïa ka kyrteng jong ki.”
U Bah Metbah u la ong ruh ba kumba long haduh mynta hi, ki don ka jingkyrmen kaba skhem ba ki paidbah kin phaikhmat noh sha ka UDP ban lamkhmat ïa ka sorkar ha kane ka samoi ban wan.
