Shillong, Kyllalyngkot 30 : Ka National People’s Party (NPP) kala ther tyngeh ïa ka All India Trinamool Congress (TMC) bad ong ba kan ïeng ban ïada ïa ka Meghalaya na ka jingthmu ba sniew jong kane ka Party na West Bengal ban pynshlei da ki “Mynder” na Bangladesh hapoh ka Jylla.
Ka AITC kala ïaid ban ïalap elekshon ha kylleng ki jaka jong ka Jylla bad kynthoh jur ïa ka NPP da ka slogan “Save Meghalaya” ne ban “pyllait ïa ka Jylla na ka jingsynshar bym hok” jong ka NPP bad ki paralok.
U Nongaiktien ka NPP Bah Bajop Pyngrope ula ong “Ngin pynthikna ba ngin ïada ïa ka Meghalaya na ka jingwan rung kyrthep ki mynder, ban ai jingïada ïa ka Meghalaya na ki Bangladesh ki ban wanrah da ka AITC ha Meghalaya”.
Ula ong ba ka AITC kam dei satia ka party kaba don hakhmat eh ha ka jingïakhun bad ka NPP namar kane ka party kam don satia ïa ka nongrim ha Meghalaya.
“Ha Ri-lum Garo, ngi hap ban ïakhun na bun ki liang bad ka TMC kam dei satia kaba hakhmat eh. Ngi hap ïakhun pyrshah ïa ka Congress kaba dang don ïa ka vote bank lem bad kiwei ki party” ong u Bah Bajop.
Ha kawei ka liang, ka TMC hapoh ka jingïalam u Dr Mukul Sangma ka ngeit ba ka dei kaba hakhmat eh ban ïakhun ha kane ka elekshon ha Jylla. Kane ka party kala pynmih ïa shibun ki jingkynnoh pyrshah ïa ka NPP ban pynbieij ïa ki nongthep vote ha kane ka elekshon.
Ka Elekshon ha Meghalaya kan long ha ka 27 tarik u Rymphang bad ïa ka result yn sa pynbna ha ka 2 tarik u Lber.