Shillong, K’lyngkot : Ka Commissionerate of Customs (Preventive) NER Shillong, CBIC, ka tnat kam pla tyngka ha ka sngi Thohdieng ba la lah ka la rakhe ïa ka “International Customs Day 2023” ha U SosoTham Auditorium, State Central Library, Shillong.
U Chief Commissioner, CGST, Customs and Central Excise, Guwahati, u Yogendra Garg, uba dei u Zonal head ka Indirect Taxes ha ka thaiñ shatei lammihngi u la wan ïashim bynta kum u kongsan ha kane ka prokram. Ha ka jingkren u Garg u la pdiang ïa ki bynta jong ki kynhun kiba ïatrei lang kum ka BSF bad Assam Rifles, ITBP, SSB bad kum kine ki kynhun na Bhutan bad Bangladesh.
U la ong ba dei ban lap bad ithuh ïa ki sap ba kyrpang. Namar ka jingkiew ka ïoh ka kot, ka jingtei ïa ki kynhun kiba khlaiñ ka long kaba donkam bha bad ruh kito kiba rung thymmai ha ka kam ki dei ban ïoh jinghikai ba bha bad ki dei ban trei ha ki kam ba ki tbit.
Ha kane ka sngi u kongsan u la sam ruh ïa ki Certificate of Appreciation sha ki ophisar bad ki nongtrei jong ka CBIC bad ki kynhun kiba ïatreilang kum ka Assam Rifles bad Border Security Force kum ka jingai jingithuh ïa ki kam ba ki la leh.
Ka Commissioner Customs (Preventive) Shillong, ka Abhilasha M. Basaiawmoit ka la ong ba ka International Customs Day, ba la sdang da ka World Customs Organization (WCO) ka dei kaba ju rakhe man u snem ha ka 26 tarik u Kyllalyngkot da ki ri ba long dkhot jong ka.
Ka India ka la long dkhot jong ka WCO ha ka 15.02.1971. Namar ba ka ri ka rakhe ïa ka Republic Day ha ka 26 tarik u Kyllalyngkot man u snem, ka Indian Customs ka rakhe ïa ka International Customs Day ha ka 27 tarik u Kyllalyngkot man u snem. Mynta u snem, ka phang jong ka International Customs Day 2023ka long “Nurturing the next generation: promoting a culture of knowledge-sharing and professional pride in Customs.”
Ki ophisar jong ka Customs Preventive NER, CGST, BSF, Assam Rifles bad DRI ki la batai shaphang ki jingshem jong ki, ki jingeh ba ki ïakynduh bad ki jingjop ha ka jingïada ïa u pud u sam bad ka jingpyntreikam ïa ka Customs Act kum shi bynta ka jingrakhe lyngba ka ‘Capacity Building and Knowledge Sharing Programme.’
Ha kane ka sngi, la wan ïashim bynta lang ruh da u Chief Commissioner Income Tax, Vice Chancellor (North Eastern Hill University), IG Border Security Force (BSF), ki ophisar ka CBIC ba la shongthait, Consul General Bhutan, bad kiwei kiwei ki nongmihkhmat na ki kynhun kiba ïatrei lang bad ka Customs kum ka Income Tax, Assam Rifles, BSF, ki Inspector ba thymmai ka CBIC, ki nonghikai bad ki samla pule ka skul bah NEHU, bad ruh ki ophisar na kiwei kiwei ki tnat Sorkar.
