Pynlong ka jylla ïa ka jingsngap jar ba ar minit ban kynmaw ïa ki nongïaleh laitluid

Shillong, Kyllalyngkot : Ha ryngkat ka ri baroh kawei, ka jylla Meghalaya hynne ka sngi Nyngkong ka la pynlong da ka jingsngap jar kaba ar minit kum ka dak ka jingkynmaw burom na ka bynta kito kiba la aiti ïala ka jingim ha ka jingïaleh laitluid jong ka ri India.Ha kane ka sngi la rakhe ruh ïa ka lyngkhuh sngi ïap u kpa jong ka ri India u Mahatma Gandhi.
Ha ka jingïalang kaba la long ha kane ka nongbah ka jylla, la pynlong ka jingsngap jar kaba ar minit hapoh ka phyllaw jong ka Main Secretariat ha ryngkat ka jingïadonlang ki heh sorkar bad ki staff hapoh ka jingïalam u Chief Secretary ka jylla Meghalaya, u Bah D P Wahlang, IAS.
Shibynta kane ka jingrakhe la pynlong ruh ka jingleit buh syntiew hapoh ka dur mot jong u Mahatma Gandhi da u Chief Secretary lem bad kiwei pat ki heh sorkar.