Sa 7 ngut ki kyrtong pynbna ka NPP na bynta ka elekshon MDC ha KHADC

Duh tiket u Bah Sherbor, ïoh u Bah Samlin na Sohiong

0

Shillong, K’Lyngkot 11 : Ka National Peoples Party ha ka sngi Saitjain ka la pynbna sa 7 ngut ki kyrtong kiban aireng ha kane ka elekshon MDC sha Khasi Hills Autonomous District Council kaban long ha ka 21tarik mynta u Rymphang.
Kine ki kyrtong ki kynthup ïa ka Dr. Amanda Pakyntien na Mawkynrew constituency, nangta u Bah Joplin Sten na Mawhati, Bah Sosthenes Sohtun MLA na Jirang, Bah Samlin Malngiang na Sohïong, Bah Elias Kharbihkhiew na Sohryngkham, Bah Sharailang Warjri na Mawthadraishan bad Bah Kordor L Nongkynrih na Mawkhar Pynthorumkkhrah.
Kane ka long katkum ka kyrwoh ba la pyllait da u Working President ka Party Bah Hamlet Dohling.
Lah ban kdew hangne ba ka Kong Amanda kadei ka kurim jong u MLA ka Mawkynrew Bah Banteidor Lyngdoh katba u kyrtong ka Sohïong pat u dei u MLA barim katei ka thain. Ha kajuh ka por u kyrtong ka Jirang pat u dei u MLA ba mynta jong katei ka constituency.
Haba phai sha ka Sohïong constituency, baroh shi katta ïa kane ka constituency la mihkhmat da u Bah Sherbor Mawlong hynrei hadien ba la khot ïa ki kyrtong ban pan tiket ki la mih bun bha kumta na ka liang ka party hadien ba ka la bishar bniah ka la jied noh da u MLA/MDC barim Bah Samlin ban mih bad aireng kum u kyrtong.
Ha Jirang pat, ka jingjied da u MLA, Bah Sosthenes ban mih ïakhun kadei hadien ba u MDC ba mynta Bah Victor u la mihnoh na ka NPP bad leit pynïasoh noh sha ka Congress. Hadien kane katei ka party ka la pynbna ruh ïa u kum u kyrtong jong ka na bynta kane ka elekshon MDC na Jirang.
Ha kajuh ka por pat haba ïadei bad ka Sohryngkham, kane ka constituency hadien ba u MDC ka thaiñ Bah Pynïaid Sing Syiem (ba bat ruh kum u CEM ba mynta ka KHADC) u la phet noh bad leit ïakhun na Nongthymmai na ka liang ka party ka la sei noh da u Bah Elias Kharbihkhiew.
Kumba long haduh mynta, ka Congress ka la dep ban pyllait haduh 25 ngut ki kyrtong na bynta ka Khasi Hills Autonomous District Council bad 26 ngut pat na bynta ka Jaintia Hills Autonomous District Council.

Leave A Reply

Your email address will not be published.