Haduh 70% la dep ban pynbna kyrteng kyrtong ka Congress, shen yn pyllait sa ka thup ba 3

Shillong, K’ Lyngkot 11: U President ka Meghalaya Congress Pradesh Committee u Bah Vincent H Pala u la ïathuh ba haduh ka sngi Thohdieng ka Congress ka la dep ban pynbna haduh 42 ngut ki kyrtong ki ban ïakhun ïa ka elekshon sha ki Autonomous District Council ka ban long ha ka 21 tarik u bnai Rymphang mynta u snem.
Haba kren sha ki lad pathai khubor hadien ba la wai ka jingïalang jong ka seng kaba dei ruh ka jingïalang ban pynithuh ïa ki kyrtong bad kumjuh ruh ka jingai jinghikai ha kaba ïadei bad ki kam ïalap elekshon, u Bah Pala u la ong ba kumba ka long haduh mynta ka Congress ka la dep ban pyllait haduh 70% bad la dep ban pymih ïa ka thup kaba nyngkong, ka thup kyrteng kaba ar bad ïa ka thup kyrteng kaba lai yn dang hap ban peit namar ki don ki thaiñ ba ki bun kiba pan tiket kumta hap ban wanrah ïa ka jingïamonlang bad ki don ruh ki area ba dang ap ïa ka jingmynjur jong ki Block Committee.
“Nga kyrmen ba kane ka elekshon kaba mynta kan long ka jingkyrkhu ïa ka Congress ruh namarba kadei kawei na ki lad ba hadien ba la phet ki MLA bad ki dkhot na ka party mynta ngi la lah ban tei biang ïa ka da kaba jied ïa ki kyrtong ba kynthup ïa kiba rim bad kiba thymmai, ki samla ki don kiba la tbit ïa ka kam ruh ki don, ki doktor, ki engineer bad kiba la pyndep ïa ka MBA ruh ki don, bad ngi ïohi ba ka dei kaba biang bad ngi ïohi ruh ba ka dang dei ruh ka por ba dang shudep ïa ka enrollment jong ka Youth Congress ha kaba kane kan pynphuh ïa ka seng ha kane ka elekshon ban wan,” ong u Bah Pala.
Haba pynpaw ka jingai khublei ia u Working President u Bah P N Syiem bad u Bah Manuel Badwar kiba la ai ki jinghikai sha kiba bun ki jaka, u Bah Pala u la ong, “Ki lah ban don hangne hangtai ki bym hun ïa ki jingai tiket hynrei ka jingai ticket kadei na ka bynta ka bha ka miat jong ka party bad ki paidbah bad ngi pyrshang ban pynhun lang ïa baroh hynrei kam dei kaba suk namar na kawei ka Consituency kiba pan tiket ki don haduh 4, 5 ngut hynrei ha kaba khatduh pat hap ai ticket tang ïa iwei bad ka long kaba eh shisha ban ai tiket bad ïa kane hap ban ïapynbeit hapoh ka party bad kane ka jingai tiket kam dei ba isih ïano ïano ne ba ieid ïano ïano hynrei kadei beit na ka bynta ka bha ka miat jong ka party.”
U la ong ba ki don ruh ki dkhot kiba la rim hynrei ki khlem ïoh tiket hynrei ki don pat kiba dang shu wan thymmai ki ïoh tiket, kumta kine baroh ka dei ba ka party ka hap ban peit na baroh ki liang.