Shillong, K’lyngkot, 02: Ka Kynhun Myntri jong ka Sorkar Jylla ha ka sngi Thohdieng ka la mynjur ïa ka jingtyrwa ban pynjlan ïa ka samoi treikam jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) sa hynriew bnai.
Ka samoi treikam jong kine ki artylli ki Autonomous District Council (ADC) kan kut noh ha ka 5 tarik, Lber, 2024 bad ka jingpynjlan ïa ka samoi treikam kaba hynriew bnai kan sdang naduh ka 5 tarik Lber, 2024.
Ka jingpynjlan ïa ka elekshon jied MDC thymmai ha kine ki ar tylli ki Council ka long namarba ki la kyrpad ban pynjlan ïa ka jingaipor ïa ki Delimitation Committee.
Ha u snem 2023, u Lat ka Jylla u la aibor ïa kine ki ar tylli ki Autonomous District Council ba kin thung ïa ka Delimitation Committee ban pynbeit ryntih ïa ki MDC Constituency jong kine ki ar tylli ki council katkum ka jingdon jong ki nongshong shnong.
U Symbud Myntri Rangbah uba peit ïa ka tnat District Council Affairs ka Sorkar Jylla, Bah Prestone Tynsong ha ka jingïakren bad ki lad pathai khubor u la ong, “dang shen ki ar tylli ki Autonomous District Council ki la phah ïa ka jingtyrwa sha ka Sorkar Jylla ban pynjlan shuwa ïa ka jingtreikam jong ki Delimitation Committee.”
Da kane ka rai ba la shim da ka Sorkar, ïa ka elekshon MDC jong ka KHADC bad JHADC la pynjlan mynta sa hynriew bnai.
U Bah Tynsong u la ïathuh ba ka Sorkar kan sa phah ïa kane ka jingai jingmut sha u Lat ka Jylla u Phagu Chauhan ba un ai ïa ka jingmynjur.
