Katno ka long kaba sngewtynnad bad kaba idon jingkyrmen ban iohi ba ka sorkar ka ju pynlong ia ka jingrakhe ia ka sngi pynneh mariang man la u snem. Ka mariang ka long shisha kaba donkam tam ha ka jingim jong u briew, wat la bun sien ngi klet ia ka jinglong ba ym don kiba lah ban im khlem kie kiei kiba ker sawdong ia ka mariang. Ha kine ki sngi ki la mih ruh ki kynhun bad ki seng trei mon sngewbha kiba la ialeh ban pynneh pynsah ia ka mariang khamtam lei lei ha kaba sumar bad ri ia ki jingim ha ki um ki wah. Ka prokram pynneh mariang jong ka sorkar ka kynthup khamtam eh ia ka jingthungdieng bad ka jingkhuid jong ka mariang, hynrei ngim shym la iohi ei ia ka jingpynneh ne tyngkai ia ki jingim jong ki sim ki doh. Ka jingshim khia jong baroh ban pynneh bad tyngkai ia ki jingim jong ki sim ki doh bad ki mrad kiba im ha ka mariang kan pyni shisha la hato ngi ngiet mo ia ka mariang?
Ha ki phew snem kiba la leit noh ki sim ki doh ki dang don jaka hapoh ka mariang, hynrei ha kine ki sngi la niar ban iohi ia ki jingim kum ki sim ba kin her bad pah sngewtynnad. Khamtam lei lei ha ki thain nongkyndong ka jingshim khia ban pynneh pynsah ai ki sim ki doh ka dang duna bha. Katba nangmih ki sngi kine ki jingthaw ba ki jingthaw ba im ki nangduh nangduh bad kane ka dei na ka jinglong ba sahdien jongngi kum ki riewlum kiba sngewtynnad ban siatsim bad ban beh mrad. La iohi ba ki don ki seng kiba trei shitom na ka bynta ban pynneh pynsah ia ki dohkha ha ki um hynrei ym shym la ioh sngew ei ei ba yn shim khia naka bynta ki sim ki doh bad kiwei pat ki jingthaw ba im ka mariang.
Wat la ka sorkar ka don iaka tnad Wild Life kaba trei naka bynta ban iada ia ki jingthaw ba im ka mariang, hynrei na ka liang kane ka tnad ka duna ban pynioh ia ka jingsngewthuh ne jingai jinghikai sha ki paidbah khamtam ha ki thain nongkyndong ha kaba iadei bad kane. Ha ki thain nongkyndong bun ki khynnah ki sngew tynnad ban leit siat sim sha khlaw bad kane ka jia namar ba kim don kata ka bor sngewthuh haduh katno kine ki jingthaw ba im ruh ki long kiba kordor. Ha ka jingshisha ka jingdon jong kine ki jingthaw kiba im ka wanrah ia ka jingsngewtynnad ia ka jingim jong u briew haba u ioh sngew ia ka jingpah sngewtynnad jong ki. Ka pynjah thait ruh ia ka jingim bad haba ki jingthaw ba im ki paw kane ka pynsngew ba ka mariang hi ka long kaba im.
Ym lah ban mutdur ba hato ka mariang kaba ngi im sawdong ha kine ki sngi la kan dang ioh pat ne em ia kine ki jingthaw ba im, Hynrei lehse lada ka don ka jingshimkhia na ka liang jong ka sorkar ban pynioh ia ki jinghikai bad pynsngewthuh sha ki paidbah khamtam ha ki thain nongkyndong, yn lah ban pynneh bad tyngkai ia kine ki jingthaw ba im. Kumba ka sorkar ka shim khia na ka bynta ka jingim briew lyngba ka jingpynlong ia ka jingialang halor ka jingpang AIDS, TV, Polio, bad kiwei pat kumta ruh ki jingthaw ba im ki donkam ia ka jingiada ia ka jingim jongki. Ka jingdon jong ki jingthaw ba im ka pynitynnad ym tang ia ka mariang, hynrei ka pyni ruh ia ka jinglong jingim jong ki nongshong shnong ba ki long kiba la shai bad ba ieit ia kiwei pat ki jingim.
Ka long kaba donkam ia ka sorkar ban shim khia ia kane ka kam da kaba iatreilang bad ki bor synshar shnong, ki seng trei mon sngewbha bad khamtam bad ki seng kiba ieit ia ka kam pynneh mariang. Ka jingshim khia halor kane ka phang khlem pep kan lah ban wanrah ia ka jingmyntoi. Ka jinghikai ka dei ban long naduh ia ki khynnah rit kiba dang khie bad kiba brai ban leh ia ki kam shlur kum kaba siat ia ki sim bad pynjulor ia ki mrad. Ka jinglah ban pynsngewthuh paidbah halor ka jingkordor jong ka jingim jong ki jingthaw ba im kan wanrah pat ia ka jingshngain jong ki jingim hi baroh.
