Ryngkat ki kyndon kyrshan ki sengbhalang bad paidbah ïa ka Public Hearing ka Myntdu Leshka Project

By Mawphor News Desk On May 11, 2023

Khliehriat jymmang 10: Ïa ka jingpynsngew paidbah lane ka Public Hearing jong ka tnat bor ding MeECL, kaba dei halor ka project ban shna ïa ka Myntdu Leshka Project Stage –II, la ïoh ban pynlong mynta ka sngi Balang ha shnong Bataw, East Jaiñtia Hills District, ha kane ka jingïalang ki la don ki shnong bad ki sengbhalang kiba la ai ïa ka jingkyrshan bad ha kajuh ka por ki la don ruh kiba ai ïa ka jingkyrshan da kaba buh ryngkat bad ki kyndon bapher bapher, kane ka jingpynsngew paidbah ka la ïaid beit haduh kaba wai khlem kano kano ka jingpynthut.
La ïoh ruh ïa ka jingbatai kaba bniah bha da kaba pyni da ka projector ha kaba u Additional Chief Engineer jong ka tnat MeECL, u Bah C syiem, u la batai bad pynshai sha ki paidbah ha kaba ïadei bad ka jingpyntrei ïa katei ka project pynmih bor ding kaba dei ka Stage-II, kaba 210 MV, la ong ba baroh ki jaka jong ki briew shimet ki ban shah ktah kiba kynthup ka shnong bataw, EJHD, ka Amtra, Trangblang Satptor bad Karkhana na WJHD, ki jaka kiba ïajan bad kine ki shnong kin ïoh ïa ki skim pynroi kaba la mang T15 klur tyngka, la batai ruh ïa ka jinglong jingman ka mariang sawdong jong ka project, ki lad ban pynduna ïa ka jingsawa, ki lad ban tehlakam ïa ka jingjaboh ka um, ki rukom treikam ban kyntiew ïa ki shnong ki thaw bad shibun kiei kiei kiba ka tnat ka la kular ban leh, ka thong ban ïada ïa kito ki nongtrei bylla ban lait na ki jingma bad shibun kiei kiei la batai shai da utei u heh jong ka tnat bor ding.
Ha kane ka jingpynsngew paidbah ki la don haduh khat phra ngut kiba la ai jingkren bad ki la poi ruh haduh khat hynñiew tylli ki dorkhas, kiba ai ki jingkyrshan ryngkat bad ki kyndon, da kaba ki la ong ruh ba lada ka tnat bor ding kam pdiang ne kyntait ïa ki kyndon kin ban ieng pyrshah ïa kane ka project ka ba yn sa pyntrei, kawei na ki kyndon kaba kham kongsan eh, ka dei kaba la buh da ki shnong kiba marjan bad kane ka project kiba la dawa na ka tnat bor ding ba ka dei ban kynthup lang ïa ki ruh ha ka thup ban ïoh ïa ki lad pynroi (Local Development Scheme), ki la pynpaw ba ki shnong jong ki ruh kin sa shah ktah jur ha ka jingpyntrei ïa ka project.
Haba kren ha ka jingïalang, U Secretary Shnong Bataw, u Bah Deihok Sumer, u la pynpaw ba ka shnong ka ai ïa ka jingkyrshan ïa ka tnat bor ding ha kaba ïadei bad ka jingpyntrei ïa katei ka project, u la ong ba kane ka dei ka kabu ba ngi ïoh, u kyntu ruh ïa ka tnat bor ding ka dei ban pynkhreh bha ha kaba ïadei bad ki kam ki jam kiban long ki lad pynroi ïa ki shnong ki thaw ka ban wanrah jingmyntoi ruh ïa ka thaiñ bad ïa ka jylla hi baroh kawei, ban ai ïa ka bor ding ha kawei na ki dong kaba ha shnong Bataw ka ba ym pat ïoh bor ding haduh mynta, hapoh kine ki plan ban pynïoh bor ding ruh ïa ki long iing kiba duk, u la ong ruh ba, ka shnong Bataw ka dei kaba pdeng ha kane ka thaiñ, te lada long kaba lah ban pynbiang bha ïa ka bor ding ha ka thaiñ, namar kumba long mynta ka don ka jingduh bor ding kaba khah khah, ka jingwan kane ka project ka dei ruh ban don ka Sub Station ka ban sam bor ding kaba biang ha ka thaiñ, ban ai kam ai jam ïa ki briew ka thaiñ khamtam kito ki longiing kiba shah ktah kiba ju im da ka rep ka riang bad ym dei ban khot da ka tender system ka ban long ka jingkhanglad pynban ïa ki briew ka thaiñ kiba dang duna ha ka pule puthi, ïa ki bill jong ki contractor dei ban siew biang por, ba ka rukom siew ïa ka bai jaka ka dei ban long kaba beit bad kaba ryntih kaba katkum ka aiñ ba ka jingsniew ïa ka bai jaka ka dei ban long ha shwa ban pyntrei ïa ka kam.
U Bah Toni Byrloi, uba u dkhot ka Land Owner Assocïation, u la pynpaw ka jingsngew kmen ba kane ka project ka wan, ha kajuh ka por u la kyrpad ïa ki heh ba ki dei ruh ban da peit bad bishar bad pynurlong ïa ki jingdawa kiba la pynpaw ha ka dorkhas ba la buh da ka Association ba kan wanrah jingmyntoi ïa ki briew ka thaiñ jong ki san shnong.
U Rangbah Shnong Borghat, u Bah Kyrmenlang Swer, u la pynpaw ba ka shnong Borghat bad ka shnong Kwator ruh kin sa shah ktah bad kin sa mad ïa ka jingtyrkhong um kaba jur, kata ynda la dam ïa ka um, u la dawa ba ka sorkar bad ka tnat MeECL ki dei ban pyrkhat, namar ka Borghat bad ka Kwator kim shym la kynthup lem ha ka thup ban ïoh ïa ki jingïarap ban kyntiew ïa ki shnong ki thaw,
U Bah Deimon Bareh, u dkhot jong ka shnong Karkhana, u la ong “Ngam pyrshah ïa kane ka project, hynrei nga kwah ban pynsgew ïa ki jingdawa jongka shnong, namar kan sa shah ktah, namar ngi la dep shah ktah ha ka jingpyntrei ïa ka Myntdu Leshaka Stage-I, kumta lada kane ka project kaba mynta kan urlong, nga dawa ban pynlong ïa ka shnong Karkhana kum ka model village, ban wanrah ïa ka Secondary School ha shnong, ban shna pynbha ïa ka madan football, ban kyntiew ïa ka kam sport, ban shna ïa ki lynti ïaid kjat, ki jingkieng ïaid kjat ban pynsuk ïa ki nongrep ban jam sha shiliang, ban buh ïa ki street light, ban pynïoh ïa ki lad ki lynti ha kaba ïadei bad ka koit ka khiah, kine ki jingdawa ki dei ba ka ophis jong ka tnat bor ding ka dei ban shim ïa ka jingkitkhleh, ki dang don ruh kiwei kiwei ki jingdawa kiba ngi la pynpaw ha ka dorkhas”
Ha kaba ïadei bad kiwei pat ki kynhun kiba ieng pyrshah, u Secretary Elaka Lakadong, u Bah Eshrom Mynthlu, u la pynpaw bad ong ba ki paidbah ka elaka baroh ki ieng ban pyrshah ïa katei ka project jong ka tnat MeECL, “ngim shah da lei lei ba ka sorkar kan shna ïa katei ka project, ngi ju pynlong ïa ka tamasa (festival) ha katei ka jaka ban pynmih pisa ban kamai, te lada shna ïa kane ka dam ka um kan duna, ngim lah shuh ban pynlong ïa ka tamasa, ngi la dep thoh shai ha ka dorkhas ba la phah sa ka tnat bad sha ka sorkar “Nga sngew phylla ban ïathuh ba balei ka sorkar kam shym kynthup lang ïa ki shnong baroh kiban sa shah ktah? Ki dei ki shnong kiba jngai tang kumba 500 haduh 800 mitar ka jingjngai na kane ka dam ne ka project ban shna ïa Power houese bad ki don haduh san tylli shnong hapoh ka elaka Lakadong ki ban sa shah ktah jur lada shna ïa kane ka project bad kita ki shnong ki dei ka shnong Borghat, Natbor, Demlakiang, Bri Khynriam, Kwator, ki dang bun ki mat jingdawa ba ka sorkar ka dei ban leh eiei na ka bynta kitei ki shnong ruh”
U la ong ruh ba ki paidbah kiba pyrshah ki dei ban don lang khnang ha kane ka jaka pynlong jingïalang, ba kin ïoh sngew ba kaei ba ka sorkar kan pynsngew ïa ki jingïohnong bad ki jing duhnong jong ki paidbah “Mynne shwa ban rung hangne shwa ban rung sha shnong Bataw, la pynsangeh ïa ki paidbah da ki pulit bad la pynphai noh ïa ki khlem ïohlad satia ban rung sha kane ka jaka ba long jingïalang” u la bynrap.
Ïa kane ka public hearing la pynïaid da u E.E jong ka tnat Meghalaya State Pollution Control Board, u Bah S.Syiem, la ïa don ryngkat lang ruh u E.E ka tnat MPSCB, u Bah F.Laloo, u ADC East Jaiñtia Hills District, u Bah J.Shylla, MCS bad u EAC East Jaiñtia Hills District, u Bah R.Brahma, lem bad ki nongïalam jong ki sengbhalang.