Shillong, Jymmang 10 : U Nongaiktien ka Sorkar bad Myntri Sorkar Bah Paul Lyngdoh mynta ka sngi ula ong ba ka Sorkar kala ïai ban ba ki laingut ki shipai Border Security Force (BSF) ba donkti ha ka jingsiat iap ïa u riew paidbah, ba ki dei ban shah pynshitom kat kum ka ain jong ka Ri.
Kat kum ka jingong jong u, ïa ki shipai BSF dei ban khynniat sha ki khappud namar ka dei ka kam jong ki ban ïada ïa ka khappud na ki kam bymman bapher bapher bad ka jingprong tuh na Bangladesh sha India.
Haba ïakren bad ki nongthoh khubor, u Bah Paul ula ong ba ka Sorkar kala ïaroh ïa ka sienjam ba la shim da ka BSF ban kem ïa ki laingut ki shipai jong ka, kiba siat iap ïa u Bah Roning Nongkynrih ha Mawshun myn ha ka 5 tarik Jymmang.
“Ngi ïai ban ba ka aiñ jong ka Ri ka dei ban ïeng bad ki (shipai BSF) ki dei ban shah pynshitom kat kum ka kam ba ki la leh namar ki la jam palat pud, kaba lam sha ka jingiap u Bah Roning” ula ong.
Haba kylli, u Bah Paul ula ong ba khlem pep, katto katne ka jingburia ïa ka jingduhnong ka dei ïa ka ban hap siew sha ki ba haïing hasem jong une u lanot haba bynrap “ïa kane ka kam yn sa pynkhreh da ka Sorkar Jylla ha ryngkat ka jingïasyllok bad ki Heh shipai BSF”.
Haba pynpaw ba ka don ka jingpynkheiñ ïa ka SOP da ki BSF, une u Nongaiktien ka Sorkar ula ong “Kawei pat ka mat ba kongsan jong kane ka kam ka long balei ba ki BSF ki don ha ki jaka paidbah haba ki dei ban don ha ki khappud”.
“Ngi hap ban phah ïa ki sha khappud. Ki dei ha ka jingshisha ban ïada ïa ka khappud bad ka Bangladesh. U pud u dei uba jrong bha bad ka donkam ban pahara bha namar ka jingdon bun ki kam khaïi beaiñ kiba jia bad ruh ka jingwan prong tuh kaba lah ban pynkylla ïa ka tarajur ha ka jingdon ki Jaidbynriew ka Meghalaya” ula bynrap.
