Pynkut ka KHADC ïa ka jingot kilo ïa ki mar rep ha ïewduh

Shillong, Jymmang 10: Ka Khasi Hills Autonomous District Council (KHADC) ha ka sngi Balang ka la lum ïa ka jingïalang hapdeng ka Executive committee (EC), ki nongrep, ki nongïalam ka Hills Farmers Union (HFU), u Syiem ka Hima Mylliem ban ïakren halor ka jingot kilo ïa ki mar rep ba wanrah ha Ïewdie lang, Ïewduh.
Haba kren sha ki lad pathai khubor u Bah Titos Chyne u la ong ba kane ka jingïalang ka la shim ïa kawei ba ka jingot kilo ha Ïewduh kan kut noh mynta ka sngi wat la ha ka jingshisha ha naduh ba ka ophis u Syiem Mylliem ka la pynbna ha u senm ba la dep ba ym dei shuh ban ot kilo ka konsil kam ju ïoh shuh ïa kino kino ki jingujor na ki nongrep.
“Ha ka jingshisha kam ju don shuh ka ujor naduh ba ka Hima Mylliem ka la pynjari da katei ka hukum jong ka hynrei ki dang don hi khyndiat tylli ki jingot kilo na kata ka daw ngi pynbna ba naduh mynta ka sngi kane ka dei ban kut noh,” u la ong.
“Nangne sha khmat ym dei ban ot kilo shuh ïa kino kino ki mar rep hynrei dei ban ot kat kum ka jingkhia ki khoh, ki kriah ne bynri ba ki nongrep ki song ïa ki mar rep jong ki ym dei banshu ot beit 1 kilo na man ka 10 ne 10 na man ka 10.” u la bynrap.
Haba ïadei bad ka jingeh kaba ki nongkhaïi ki pynpaw ba ka jingot kilo ka dei ban buria ïa ki jhur bad mar rep ba pyut kiba don lang ha ka juh ka song, u Bah Titos u la ong, “ngi la ïakren ha ka jingïalang bad ngi la rai ban ai jingmut ba ki nongrep ki dei ban theh beit ha jaka ban paw lut ba ki nongthied ruh kin ïoh tang ki mar kiba bha ban shu kyntait ïa ki mar kiba sniew bad ba la pyut,” u la ong.
U la ïathuh ba ka Konsil kan sa pynmih ïa ka rai mynta hi ka sngi ba ka jingot kilo ha baroh ki ïew ba hap hapoh u pud u sam ka KHADC kin kut noh.
Shuh shuh u la ïathuh ba ka Konsil ka la rai ban thaw ïa ka committee kaba kyrpang ban peit ïa ka jingeh ki nongrep ban khlieh da ma u ha kaba ki nongrep, ki MDC, ki nongkhaïi bad khieh nongsynshar kin sa long ki dkhot.
U Bah Titos u la ïathuh ruh ba ka KHADC hapoh ka jingïalam jong u kum u khlieh ka konsil kam heh tang ka nia hynrei ki la trei la ka bynta ki nongrep ha ka die ka thied da kaba wanrah da ka jingpynkylla ïa ka Amendement Bill ïa ka Khasi Hills Autonomous District Establishment, Management and Control of Market ha kaba da ka aiñ la mana tyngeh ïa ka jingot kilo bad kumba long mynta ki ap satang ïa ka jingmynjur na u Lat ka jylla.
U Bah Titos u la pyntip ruh ba mynta ka sngi na ka liang ka KHADC lyngba ki Executive Member ba peit ïa ka market, ka Trade, ka Council Asset kin sa jurip ïa ka Ïewdielang mynta ka sngi na bynta ban ïakren bad ki nongrep ha kaba ïadei bad ka jingeh kaba ki ïa kynduh na ka jingot kilo “hynrei kin ym leit tang na bynta kane mat hynrei ban jurip ruh ïa ka jingtei jong ka Hima Mylliem ba lehse na ka liang ka konsil kan lah ban ai jingïarap na bynta ban pynbha ïa ka ïew, nangta ban jurip ban pynthikna ba yn ym don shuh ki nongshong die madan be-aiñ kibym don ki kot ki sla khamtam eh kiba dei ki bar jylla,” u la ong.
Lah ban kdew ba kane ka jingleit jurip jong ka KHADC ïa ka Ïewduh ka dei shisngi shuwa ba ka Myntri ba peit ïa ka tnat ka rep ka riang ka sorkar jylla ka Kong Ampareen Lyngdoh kan sa leit ban jurip ïa ka Ïewduh kata ha ka 12 tarik mynta u bnai.