415 klur tyngka mang ka sorkar ban pyntrei ïa ki 17 tylli ki projek kam jngohkai ha ka jylla

Shillong, Jymmang 10 : Ka Sorkar Jylla ka la buh ïa ka mang tyngka haduh T. 415.93 klur ban pyndonkam ha ka jingpyntrei ïa palat 17 tylli ki project kiba thmu ban kyntiew ïa ka kam jngohkai pyrthei ha Jylla Meghalaya.
Haba pyntip ïa kane mynta ka sngi u Myntri ka Tnad Tourism Bah Paul Lyngdoh ula ong ba hapoh ka prokram ba la khot ka Meghalaya Eco Tourism Infrastructure Development, 17 tylli ki project ki la don ha ki kyrdan bapher bapher jong ka jingpynkhreh.
“Ka song pisa ba kot T. 415.93 klur la dep ban mang ïa kine ki project” ula ong haba ïakren bad ki nongthoh khubor.
U Myntri u pyntip ba kine ki project ki kynthup ïa ka Shillong Peak Ropeway, ka ban sdang pyntrei ha u bnai Naiwieng mynta u snem, ka Integrated Hospitality Convention Centre, Tura kaba dang pyntrei mynta, ka Hospitality Complex bad Tourism Infrastructure ha Mawlyndep, Sohra bad Chibagre kaba la don ha ka jingpynkreh ïa ka DPR, ka jingpynkylla dur ïa ka Convention Centre ha Orchid Lake Resort, Umiam bad ka Tourism Infrastructure ha Nongkhnum River Island.
“Kine kila don ha ki kyrdan bapher bapher ha ka jingïaid ki kam bad ngin don ha ka lynti ban sdang noh ïa ka jingkhot tender hapoh ki ar-lai bnai ban wan” ula bynrap.
U Bah Paul u pyntip ba dang shen ula leit ïuhkjat ha ka Shnong Kongthong ha ryngkat bad u MDC ka thaiñ u Bah Titosstarwell Chyne uba dei u CEM ka KHADC bad pynbna ban sa tei ïa ka Hospitality Complex ha kane ka Shnong. “Ngi la mang T.7.45 klur ïa kane ka project” ula bynrap.