U Bah Hek u kwah ba ka sorkar MDA-2 kam dei ban wan phai biang ha ka bor : Dr Mukul

Shillong, Jymmang 10 : Da kaba kyntait ïa baroh ki khubor kiba saphriang kylleng, u Nongïalam ka AITC ba dei ruh u Myntri Rangbah barim ka Jylla Dr. Mukul Sangma ha ka sngi Balang u la kyntait ïa ki jingphrïang ki khubor ba u don ka jingïakren bad u heh BJP bad Myntri ka sorkar jylla Bah AL Hek ba ka lah ban don ka jingpynïasoh noh jong ka party bad ka BJP.
U Dr. Mukul u la pynpaw ruh ba na ka liang u Bah Hek u la kyntu ruh ïa ki nongïalam ka AITC ba ki dei ban pyntikna ba ka sorkar MDA ba ïalam da ka NPP kam dei shuh ban wan ha ka bor ha ka jylla.
Kane ka la wan hadien khyndiat sngi ba u Bah Hek u la kam ba ka la don ka jingïa kren por dihsha bad ki heh ka AITC shaphang ka jingpynïasoh noh bad ka BJP.
Haba kren bad ki lad pathai khubor, u Dr. Mukul u la kubur ruh ba u la ïa dihsha bad u Bah Hek ha ka 03tarik u Lber kata shisngi hadien ba la pynbna ïa ka result elekshon MLA.
“U Bah Hek u dei u paralok ba jan jongnga ngi la ïatrei lang la kham slem bad u la don lang ha ka kynhun Myntri ha ka por ba nga long kum u Myntri Rangbah. Kumta phi ïohi ba kane ka jingïadei kaba la slem kaba u kwah ban ïa kynduh ïanga ha ka step 3tarik u Lber bad ngi la ïa dihsha bad ai khublei mar kylliang. Hynrei namar ba u kyrkieh ban leit jingïalang u la ong ïanga kawei ba um sngewtynnad satia bad ka jingmih na katei ka elekshon namar ka BJP ka la pyrshang buit bad bor ban jop kham bun,” bynrap biang u Dr. Mukul.
Nalorkata u ong ruh ba katei kadei ka sien kaba khatduh ba u ïa kynduh bad u Bah Hek bad kam shym la don satia kano kano ka jingïakren ban leit pynïasoh sha ka BJP.
U Dr. Mukul u ong ruh ba ka daw kaba pynlong ïa u ban ngeit shaphang katei ka khubor shaphang jong u ban ïasoh bad ka BJP kadei namar kadon ka jingïadei bad ka elekshon ha Sohiong.
Shuh shuh u ong ruh ba kadei kaba ju jia na bynta kino kino ki party ban pynroh ïalade. “Ngi ruh ngi leh kumjuh bad ngi kwah ruh ba kiwei ki MLA kin wan ban pynïasoh lang bad ngi bad ngi pdiang sngewbha ruh ïa ki paralok kiba kwah ban wan pynïasoh sha ka TMC. Nga la dep ruh ban pyrshang ïa ki paralok na kiwei ki party ruh hadien ba la pynbna ïa ka result,” u la ong.
Kawei pat kaba u Dr. Mukul u pynpaw ha kane ka sngi ka long ba kin ym ailad satia ïano iano ban shu lehkai ia ki paidbah bad ïa jylla. U ong ruh ba bun kiei kiei kin sa paw ha kine ki khyndiat sngi ban wan.