Elekshon ha Sohïong : Na ka jingshongshit sha ka jing jai jai ha ka sngi thep vote, poi thep 91.92 %

Shillong, Jymmang 10: Ka elekshon ha Sohïong Constituency ka la kut noh ha ka 10 tarik u Jymmang 2023, ha kaba la don kumba 91.92 % kiba wan thep vote na ka bynta ban jied ïa u MLA ba thymmai, kata hadien arbnai tam ba kiwei pat ki 59 tylli ki Assembly Constituency ki ladep jied ha ka 27 tarik u Rymphang 2023. Ha baroh don 34,783 ngut ki nongthep vote, ha kaba 17,096 kidei ki shynrang bad 17687 ngut ki kynthei. Kine ki paidbah kin thep vote ha ki 63 tylli ki Polling Station.
Ki don hynriew ngut ki kyrtong ban ïakhun ha kane ka elekshon bad kita ki long u Bah Samlin Malngiang jong ka NPP, u Bah Synshar Lyngdoh jong ka UDP, u Bah S. Osborne na ka Congress, Bah Eric Kharbuki jong ka BJP, Bah Stoding Thabah jong ka Trinamool Congress bad Bah Sandondor Ryntathiang jong ka HSPDP.
U Chief Electoral Officer (CEO), Bah Federick Kharkongor ha ka sngi Balang u la pyntip ba ka jingpoi ki nongthep vote ha Sohiong tad haduh ka por 6:00 baje janmiet ka la poi haduh 91.87 persen ha kane ka kynti mynta da kaba tam wat ïa ka samoi ba la dep ha u 2018 ruh.
Haba kren bad ki lad pathai khubor, u CEO u la pyntip ruh ba tad haduh ban da dep ban thep vote lut ha ki 63 tylli ki polling station ym shym la don kino kino ki jingjïa kiban pynthut ïa ka jingïaid beit ïaid ryntih jong ka elekshon. Da kaba pynpaw artad ïa ka jingkmen halor ka jingpoi bun ki nongthep vote, u CEO u la ong ba ha kane ka elekshon ki sakhi ruh ïa ka jingpoi ryntih bha jong ki longkmie ban pyndep ïa ka hok jong ki.
“Kiba bun kiba wan ban thep vote ki dei ha ka por mynstep bad na kine ki don haduh lai tylli ki polling station kiba ka jingpoi ki nongthep vote ka la palat ïa ka 96 persen,” u la ong. Kitei ki polling station ki kynthup ïa Mawmaram – B kaba la poi palat 96.49 persen, Kharangoi da ki 96.45 persen bad ka Nonglyngkmen pat da 96.38 persen.
Tad haduh katei ka por, la ïathuh ruh ba ka polling station kaba duna eh ka jingpoi ki nongthep vote kadei ka Rynli da ki 73.22 persen.
Ha kajuh ka por u la pyntip ruh ba kam shym la don kano kano ka jingujor ba kan don ka jingpynthut na ki kor thep vote ha baroh kawei ka constituency.
Na ka liang u CEO u la pyntip ruh ba ka tnad Excise ka la ïoh ruh ban kurup haduh kumba 1,104 litar ka kyiad phareng tang ha kane ka sngi thep vote, ka jingïoh kurup kaba la bun bha tang ha ka shisngi.
Ha ka por ba ïalap elekshon la ïohi ba ki la mih bun ki jingkynthoh na kylleng kylleng ba ka jingïalap elekshon ha Sohïong ka la i kamkai namar ba la shu ïabeiñ ïakhoh beit ha rynsan ïalap elekshon bad kam shym la don kano kano ka jingkren halor ka roi ka par. Ki don pat kiba sngewtynnad ban peit namar ka jingïaban nia hapdeng ki heh jong ka UDP bad ka NPP, khamtam u Bah Amazing Kurbah bad u Bah Prestone Tynsong bad kiwei kiwei ki nongïalap elekshon. Nangta la ïohi ruh ïa ka jingïamih ki paidbah ban leh shongshit ban ïarwai ïashad ban ïakiew halor ki kali ban ïashad ïakmen ban ïakynhoi ryngkat ka jingïapyrta ban vote ïa la ki jong ki kyrtong. Kiba bun ki la pynpaw ka jingsngewkhuslai ïoh ba kane ka jingïashongshit ka poi sha ka jingïakynad ne ïashoh ïadat, namar ba ka la jur palat ka jingïabeiñ ïakhoh bad ka jingïakwang ktieh. Hynrei kumba ka la long ha ka sngi ba kut ka jingïalap elekshon, kata ha ka 8 tarik, wat lada ka UDP bad ka NPP kiba long ki Party ba kham sei bun paid eh ha Sohïong, wat lada ka jingïalap elekshon ka long marjan bad ba ki paidbah ruh ki ïa ïaid lang na kajuh ka jaka, hynrei ka long kaba itynnad pat ba kam shym la don kano kano ka jingjia bad ki paidbah ki la risa ki ïakynhoi ha la ka jong ka jong ka Party ne ha la ka jong ka jong ka jingsngewtynnad.
Nangta ha ka sngi thep vote lei lei, la nang kham itynnad shuh shuh ïa ka jinglong jai jai ka jingïathep vote bad ka jingïatreiang ki bor shnong ryngkat ki bor pynïaid elekshon ha kaba pynlong ïa ka jingïathep vote kaba ïaid beit ïaid ryntih bad khlem don satia kano kano ka jingïakulmar wat hadien katto ka jingïakhluit ha ka por ba kanbas. Ka burom kadei ban leit sha ki paidbah kiba la pynpaw ka jingsngewthuh bad kumjuh ruh ki nongpynïaid elekshon bad ki bor shnong na ka bynta kane ka jingjop ka jingïathep vote ha Sohïong.
Kaba sah mynta ka long sa ka 13 tarik kaba dei ka sngi ban ñiew vote ha kaba la khmih lynti ba ki paidbah ba bun ki ïa mih na la ki ïing ki sem ban leit sha ka jaka ñiew vote ban ap khmih lynti mano ban ïoh rah ïa ka thong lane mano ban long u MLA ba thymmai jong ka Sohïong Constituency. Ñiuma ha ka jingïaleh kan don beit ka jingjop bad ka jingrem. Ki paidbah ki donkam ban sngewthuh ïa kane. Ym dei ban thaw kino kino ki jingkulmar, hynrei dei ban pdiang ïa ka rai jong u paidbah. Kiei kiei kiba kiba la ïakren ha ka elekshon kidei ban kut noh la ka long ki jingïakawang ktieh, ki jingïabeiñ ïakhoh ne kino kino ki jingïapynbud nam sniew.
Ka Sohïong ka dang donkam ïa kiba bun ki kam pynroi ha kiba bun ki liang, la ka long ha ki lynti ki syngkien, ki jak sumar, ki jaka pule, ka roi ka par bad kiwei kiwei de ki jingdonkam ban kyntiew ïa ka ïoh ka kot jong ki paidbah.