Shillong, Jymmang 10 : U Myntri sorkar bad Nongpathai khubor jongka MDA u bah Paul Lyngdoh u la ong mynta ka sngi Balang ba ïa ka mat Reservation Policy bad Roster System dei ban ïathir sani bha da baroh 60 ngut ki MLA ba la jied da ki paidbah.
Kane ka jingkren jongu ka long hadien ba ka VPP ka la ïawer ïa ki paidbah ban synran lem ïa ki 4 ngut ki MLA jongka ha ka 12 tarik ba kin leit ai ïa ka shithi sha ka sorkar ban dawa ban bishar bniah noh kloi katba lah ïaka Reservation Policy.
Haba kren sha ki lad pathai khubor u bah Paul u la ong “ Ka Party kaba don la ki jong ki agenda ai kin pynleit jingmut ha kita ki agenda jongki bad nga ngeit skhem kum ki nongmihkhmat paidbah kin ym leh tam bad pynthut ïaka shongsuk shongsaiñ ha ka nongbah bad jylla”.
“ Ha kajuh pat ka por kane ka mat ka dei ka ban hap ïatai ïathir bha ha ïing Dorbar Thawaiñ, ha ka Kynhun Myntri bad baroh 60 ngut ki MLA. Kumta nga tharai la dei ban ïeh shwa hangta namar wat u Myntri Rangbah ruh u la dep kren shai ba hadien ka election Sohiong ïa kane ka mat yn sa rah ban ïakren ha ka rynsan ban lum ïa baroh ki seng saiñ pyrthei, ha ka kynhun myntri bad kumjuh ruh bad ki seng bhalang bapher bapher kiba la pynpaw ïa kiba bun ki jingsngew bad jingkdew halor kane ka kam ha kine ki khyndiat por ba la leit noh” ong u bah Paul.
U la ïathuh ba ka sorkar kan ïa mir jingmut lang halor ka Reservation Policy bad kumjuh ruh halor ka Roster System namar kine ar ki don ka jingïadei bad ym lah ban ïakren la ka jong ka jong. Dei hadien ba la ïoh sngew ïa ki jingai jingmut na ki seng saiñ pyrthei, ki seng bhalang bad baroh kiba ïadon bynta yn sa lah ban poi sha ka thong ban shim ïa ka rai ba ïa mynjur lang da baroh.
