Nongpoh, Rymphang 29: Kumba mynta ka sngi la rakhe ha kylleng ka ri ïa kata ka sngi ba la tip kum ka National Science Day, ka Alpha English Higher Secondary School mynta ka sngi ka la rakhe ïa kane ka National Science Day ba la shim bynta da ki samla pule jong ka Class-X.
Ïa kane ka National Science Day la pynlong ha phyllaw katei ka skul, ha kaba la wan ban shim bynta lang naduh u District Science Supervisor, u Bah S. Blah, ka Principal ka Alpha English Higher Secondary school, ka Kong W.K Blah, u Vice Principal ka Alpha English Higher Secondary School, u Pastor B. Kharbteng, ki nonghikai bad kiwei kiwei ki bor pynïaid jong katei ka skul.
Kumba la pynpaw da ki bor pynïaid katei ka skul, kane ka skul ka la rakhe ïa kane ka National Science Day ka long shi bynta ban ailad ïa ki samla pule ba kin don bynta shaphang ka jingstad science kaba long katkum ka juk stad ba mynta. Ha kawei ka bynta ka don ruh ka thong ban kyntiew ïa ki samla pule ba kin tip bñïah shaphang ka jingstad science kaba long hi ka jingkyntiew na ka bynta ka lawei ki samla ha kum kane ka juk stad ba mynta.
Ha kane ka sngi, la iohi ruh ba ki khynnah skul ka Alpha ki la pyni paidbah ruh ïa ki bynta bapher bapher (Science exhibition) da kaba batai ruh shaphang ka jingstad science, kaba long ka jingai mynsiem ïa ki samla pule ba kin kham phai khmat bha shaphang ka jingstad science.
