Ryngkat ki jingïaphylliew jingmut, wan ïuhkjat u Lat ka jylla ha South West Khasi Hills District
Mawkyrwat, Jymmang 22: U Phagu Chauhan u Lat ka jylla Meghalaya u la wan iïuhkjat hynnin ka sngi U Blei ha Mawkyrwat ha kaba la ïa synranlang da u BDR Tiwari, IAS, Commissioner & Secretary to the Governor of Meghalaya la pdiang sngewbha da u bah T. Lyngwa, IAS, Deputy Commissioner, South West Khasi Hills District, Mawkyrwat ryngkat ka Salami ha phyllaw jong ka Circuit House, Mawkyrwat ha ka jingïadonlang u Rajiv Sharma, Commandant ka BSF, u J.D. Kharwanlang, Superintendent of Police, Mawkyrwat bad kiwei pat ki nongtrei sorkar.
Ha kane ka jingwan ïuhkjat jong u ha South West Khasi Hills District, Mawkyrwat ula leit ban jurip ïa ka jaka sumar ba 100 jingthiah ka Civil Hospital Mawkyrwat, ka Maharam Government Higher Secondary School, Mawkyrwat bad kiwei pat ki kam pynroi kaba hap hapoh ka MGNREGA kaba don ha Mawpon.
Ha kajuh ka sngi u la pynlong ka jingïakynduh lang bad ki ophisar jong ka distrik, na ka State bad Central Government ryngkat ki Syiem jong ki Lai Hima bad ki nongsynshar shnong kaba la long ha Conference Hall jong ka Circuit House, South West Khasi Hills District, Mawkyrwat.
Ha ka jingïakynduh bad ki khynnah skul ka Maharam Government Higher Secondary School, Mawkyrwat u Lat ka Jylla, u Phagu Chauhan u la ong ba ki khynnah skul ki longkum ki syntiew kiba phuh bad kiba pynmih ïa ka jingiwbih bad ba ki long ka lawei ba phyrnai jong ka ri bad ka jaidbynriew da kaba ai mynsiem ïa ki bantrei shitom bad kiba minot ha ka jingpule khnang ba ka lawei jong ki kan long kaba jop.
Ha ka jingïakynduh bad ki ophisar kiba na ka distrik, state bad central government kibala pynsngew ha u shaphang ka jingpyntreikam ïa ki skhim bapher bapher ha ka South West Khasi Hills District kum ka pule puthi, ki lynti ki syngkien, ka umbam umdih, bad kiwei kiwei ki skhim pynroi. U wei na ki ophisar ba dei peit ïa ki Border Security Force (BSF) u la pynpaw ïa ki jingeh kiba ïa dei bad ka Border Areas ha kaba ïadei bad ki lynti ki syngkien, ka umbam umdih, Border Fencing ha kaba u Lat u la ai jingmut ïa ki ophisar kumno ban leh bad ban thaw ki lad na ka bynta ban weng ïa ka jingeh kaba ki paidbah kiba don sha thaiñ nongkyndong khamtam kito kiba don ha ki Border Areas ki ïa kynduh na ka por sha ka por bad khamtam eh ban wanrah ïa ka shongsuk shongsaiñ.
Ha kane ka jingwan jurip jong u Lat ka jylla Meghalaya, u Phagu Chauhan, u la ïoh ruh ban ai ki jingai sngewbha ha ka Principal jong ka Maharam Government Higher Secondary School, Mawkyrwat, sha u Medical Superintendent jong ka jaka sumar ba 100 jingthiah (Civil Hospital) Mawkyrwat bad kumjuh ruh sha ki pulit.
Khamshwa, u bah. T. Lyngwa, I.A.S., Deputy Commissioner jong ka South West Khasi Hills District, u la plie ïa ka phang ban ïa kren ryngkat ki katto katne ki jingbatai ba ïa dei bad ka South West Khasi Hills District da kaba pynbud da ka Power Point Presentation na ki tnad treikam jong ki ophis halor ki jingpyntreikam ïa ki kam pynroi hapoh jong ka South West Khasi Hills District.
U bah K. Nongsteng, MCS, Extra Assistant Commissioner, South West Khasi Hills District ula ai ki kyntien pdiang sngewbha katba ka kong Y.R. Mawlong, MCS, Additional Deputy Commissioner, South West Khasi Hills District ka la ai ki kyntien khublei.