Ryngkat ka jingishongkun la rakhe ïa ka Republic Day ba 76 ha South West Khasi Hills District

0

Mawkyrwat, K’lyngkot 28 : Ryngkat shityllup ka Ri India, ha ka 26tarik mynta u bnai la rakhe ïa ka jingdap 76 snem ka jingïoh Republic ha kaba ïa kane ka sngi kyrpang la rakhe ha South West Khasi Hills District ha kaba u Ma Sniawbhalang Dhar, Deputy Chief Minister bad Minister jong ka Commerce & Industries, Community & Rural Development, Soil & Water Conservation, Transport, bad kiwei de ki kam hapoh jong ka Sorkar Jylla Meghalaya u la pynher ïa ka Lama ka Ri bad shim ïa ka Rashtriya Salute jong ka kynhun parade kaba kynthup naduh ki Pulit, ki NCC haduh ki khynnah skul ba la pynlong ha phyllaw Ïingskul jong ka Nativity Higher Secondary School, Mawkyrwat.
Lah ruh ban kdew ba kumba 7 tylli ki skul ki la ïashimbynta ha ka March Past kynthup ïa ki Police bad ki NCC Cadets bad kumjuh ruh ki 8 tylli ki tnad treikam jong ka sorkar ki la ïashimbynta ha ka jingïakop pyni ïa ki Tableau.
Ha ka March Past, ka Maharam Government Higher Secondary School, Mawkyrwat ka la rah ïa ka khusnam nongjop bad bud da ka Jingiaseng Kynthei Mawkyrwat Presbytery Higher Secondary School, Mawkyrwat ha ka kyrdan kaba ar bad ka Little Star Higher Secondary School, Mawkyrwat ha ka kyrdan kaba lai.
Ha ka Tableau Presentation, ka District Commerce & Industries Centres (DCIC), South West Khasi Hills District ka la ïoh ïa ka kyrdan ba nyngkong, bud sa ka ophis jong u Water Resources, South West Khasi Hills District ha kaba ar bad ka ophis jong u Soil & Water Conservation, Mawkyrwat Division ha ka kyrdan kaba lai.
Ha kaba ïa dei bad ka Cultural Programme, la ïoh ban sam ïa ki syrnod ïashimbynta sha baroh lai tylli ki kynhun. Shuh shuh la ïoh ruh ban sam ïa ki khusnam sha ka Rangthong VHC kaba hapoh jong ka Rangthong PHC na ka bynta ka jingleh bha ha ka Health & Wellness Centre (HWC), bad ka kong Silbina Shangpliang kum ka Best AHSA (Mawthawpdah PHC) na ka shnong Laitlawsnai, South West Khasi Hills District.
La pynshongshit shuh shuh ïa kane ka sngi da ka Cultural Programme, ka jingsam jingbam da ka Officers’ Club, Mawkyrwat sha ki khunswet jong ka Hope Orphanage.
Ha kane ka jingrakhe la wan ban ïa sakhi lang da ki nongtrei sorkar, ki khynnah skul ryngkat ki nongshong shnong jong ka Mawkyrwat C&RD Block kynthup ruh ïa u bah Renikton Lyngdoh Tongkhar, MLA jong Mawkyrwat Constituency, u bah B. Mawlong, IAS, Deputy Commissioner jong ka South West Khasi Hills District, ba u bah B. Jyrwa, MPS, Superintendent of Police jong ka South West Khasi Hills District.
RANIKOR: Ïa ka jingdap 76 snem ka jingïoh Republic la rakhe ruh ha Ranikor Civil Sub Division ha kaba u Subir Marak, MLA jong ka Rangsakona Assembly Constituency, South West Garo Hills District u la pynher ïa ka Lama bad shim ïa ka salute jong ki Parade Contingents kiba kynthup naduh ki Police bad 5 tylli ki skul kiba don ha kane ka dong ka thaiñ ha ka jingïalang kaba la long ha madan Nolikata, Ranikor Civil Sub Division.
Ha kane ka sngi la pynlong ruh ïa ki Cultural Programme, ki jingïalehkai ïa ki khynnah bad kiwei de ryngkat ka jingsam ïa ki khusnam sha ki nongjop.
Ha ka March Past, ka Border Achick Secondary School ka ïoh ha ka kyrdan ba nyngkong bad bud sa ka Nolikata Higher Secondary School ha kaba ar bad ka Jingaiti Secondary School ha ka kyrdan kaba lai bad kumjuh ruh u Aditya Hajong kum u Best Commander.
Nangta, ha ka Cultural programme, la ïoh ban sam ïa ki syrnod jong ka jingïashimbynta sha ka Saindur Village Organization jong ka Dirang bad ka Dondima Village Organization jong ka West Rangasora.
Shuh shuh la ïoh ruh ban sam ïa ki khusnam sha ka 18 Mile VHC na ka bynta ka jingleh bha ha ka Health & Wellness Centre (HWC), bad ka Sonali Sangma kum ka Best AHSA (Khonjoy PHC) na ka shnong Chibak, South West Khasi Hills District.

Leave A Reply

Your email address will not be published.