Ryngkat bad u MLA rakhe dap shi snem ka seng ki Nongbylla ha Mawiong Umjapung

Shillong, Risaw: Ka seng jong ki nongbylla ha Mawiong Umjapung ka Domestic Worker Union hynne ka sngi Balang ka la pynkhuid ïa ka wah Umshing kum shi bynta jong ka jingrakhe dap shi snem ka seng ka jong ki.
“Ngi la pyrkhat bad puson kaei ba ngin leh na ka bynta kane ka jingdap shisnem, hynrei khatduh ngi sngew ba ka dei ïa ngi ban shim ïa ka sienjam da kaba pynkhuid ïa ka wah umshing kaba ngi la ïohi ïa ki jingjaboh jong ka wah,” ong ka kong Sngewbhalang Bamon, President ka Seng ki Nongbylla (Domestic worker Union).
Ka kong Bamon ka la ong ruh, “Nga ai khublei ïa u MLA ka thaiñ u bah PT Sawkmie ba la wan jngoh ban don lang bad ngi, kumjuh ruh ïa u Rangbah shnong Mawiong Umjapung.” Ka kong Bamon ka la bynrap da kaba pynpaw ka jingsngewkmen ïa ka jingwan ai mynsiem jong u MLA, u bym ju iehnoh bad uba ïai don ryngkat barabor bad ki.
Katba na u Bah PT Sawkmie u la pynpaw ba u dap da ka jingsngewkmen ban ïa don bynta lang bad ka seng ki Nongbylla ha kane ka jingrakhe dap shisnem ka jong ki.
Ha kane ka sngi la ïoh ruh ia ka jingkren na u bah Anthony Kharkongngor, rangbah shnong ka Mawiong Umjapung uba la pynpaw ba baroh ki nongshong shnong ki pyndonkam ïa ka wah umshing khamtam ki nongsait jaiñ, kumta u kyntu jur ban sumar bad ban pynneh pynsah ïa ka jingkhuid jong kane ka wah khnang ba kan long hi ka jingmyntoi na ka bynta ki paidbah nongshong shnong.