La pynkut noh ïa ka jingleh niam da kaba leit bret ïa ki blei ha EJH

0

Khliehriat, Risaw 5 :Ka jingleh niam jong ki paid riew ngeit Hindu, ka Dusseshra (Maha Navami Dashmi) ka la poi sha kba kut mynta ka sngi, ha kaba ïa ki blei kiba na ki khat ar tylli ki puja pandal kiba don ha East Jaiñtia Hills District la leit ban bret noh ha ki jaka ba la pynkhreh.
Kum ban shu phai dien, ha baroh kawei ka East Jaiñtia Hills District, ki la don haduh khat ar tylli ki puja pandal ba la pynkhreh da ki Puja Committee bapher bapher ha Khliehriat East, ha Ladrymbai Datsimpeiñ, Ladrymbai Khliehdupon, ha ïew Umpleng, ha Naman Compund ha Sookilo bad hynñiew tylli pat ki pandal ki don ha ki karkhana dewbilat (cement plant) bapher bapher kiba don ha East Jaiñtia Hills District.
Ia ki blei kiba na ki san tylli ki puja pandal la bret ha Umsyllih, katba kito kiba na ki pandal kiba don ha ki karkhana dewbilat pat ki la bret hala ki jong ki jaka ba ki la pynkhreh kiba don hapoh ki cement plant jong ki hi.Kane ka jingleit bret blei ka la sdang naduh ka por 1 baje mynsngi bad kut haduh ka por janmiet.

Leave A Reply

Your email address will not be published.