Rung u Bah Robert June sha ka saiñpyrthei da kaba pynïasoh bad ka UDP

Mawkyrwat, Naiwieng, 12: U President ba la shong thait jong ka Hynñiewtrep Youths Council (HYC) Bah Robertjune Kharjahrin ha ka sngi saitjaiñ u la rung sha ka jylli jong ka saiñpyrthei da kaba pynïasoh bad ka United Democratic Party (UDP) hadien ba u la don jingthmu ban aireng ha ka elekshon MP sha Lok Sabha ka ban sa long ha u snem ban wan.
Ïa u Bah Robertjune la pdiang burom da u MLA jong ka Mawkyrwat Consti-tuency u Bah Renikton L. Tongkhar ryngkat ka jingïadonlang jong ki nongkitkam ka UDP Mawkyrwat Circle bad ki bahaïing hasem jong u Bah Robertjune ha ka jingïalang kaba la long ha ophis treikam jong ka UDP Mawkyrwat Circle.
Haba kren ha ka jingïalang u Bah Robertjune u la phla, “hakhmat jong phi mynta nga dei u riew thymmai hynrei ha ka vote hi ngam long shuh uba thymmai namar la bun tylli ki vote nga la ai sha ka UDP”.
“Ha nga, ka UDP kam dei shuh ka party kaba thymmai, hynrei tang kawei ka long haba ïa nujor haba don hapoh ka sengbhalang ïa ki mat ki jura bad ki thymmei jong ka jinglong um ïohi ba kan da don than ka jingïajngai, ne ban pynkhohñioh ïa lade ban tip haba dawa ïa ki mat ba kongsan jong ka ri bad ka jaidbynriew tip ka dang long neem kumba long mynshwa? Hynrei em kam don kaba kumta namar ki dei ki juh bad ki pher tang ha ka lynti jong ka jingdawa,” ula ong.
U la ai ruh ka jingkular ba nangne shakhmat un ai ka jingïatreilang ban pyntyllun ïa ki kam hapoh ka party namar ha ka saiñpyrthei kum u briew hi u dang long uba thymmai bad ha kajuh ka por u buh ruh ka jingkyrpad ba nangne shakhmat kum ki nongïalam ne ki nongkitkam ba la rim hapoh jong ka UDP ki dei ban long ka kti kamon ka kti kadiang ban kdew ne pyni lynti namar kiba la don lypa ki kham tip ïa ka lynti kumno ban ïaid ne pyntyllun ïa ki kam,” la ong u Bah Kharjahrin.
Da kaba pynpaw ïa ka jingthmu ban tyrwa ïalade kum u kyrtong ha ka Election Lok Sabha na ka Shillong Constituency, u Bah Kharjahrin u la ong, “lada ki paidbah ki ai ka jingkyrshan ha u snem 2024, u Bah Robertjune um donkam shuh ban leit ïakynduh ïa ki MP ban dawa ba ki dei ban leh ne pyntreikam ïa ki jingdonkam hapoh jong ka ri bad ka jaidbynriew hynrei, nga hi da lade nga dei ban ong, ba nga hap ban leh ïa ki jingdonkam jong ka ri bad ka jaidbynriew.”
Kum ka dak jingpdiang burom sha ka party u Bah Renikton u la pyndeng ha u Bah Kharjahrin ïa ka lama jong ka UDP.