Weng kam noh shwa ïa u technical officer/senior consultant ngin sa ïakren halor ki jingdawa : JAC NEHU

Shillong, Naiwieng 12 : Ka Joint Action Committee (JAC) ba kynthup ïa ka NEHUTA, NEHUNSA bad NEHUSU ha ka sngi U Blei ki la shim ïa ka rai ba ki long kiba kloi ban leit sha ka miej jingïakren halor ki mat jingdawa jong ki tang lada la weng noh noh ïa u technical officer/senior consultant uba la shu thung beaiñ.
Ha ka kyrwoh ba la phah da u Chairman ka JAC, u Prof Lakhon Kma u la ong, “Lada weng noh shwa ïa u technical officer/senior consultant, na ka liang ka JAC ka long kaba kloi ban kren halor kitei ki mat jingdawa kata ruh lada ka don ka mon ba skhem na ka liang u VC ban pynbeit noh ïa ki ishu.”
Katei ka jubab ba ka JAC ka ai kadei hadien ba u Vice Chancellor ka NEHU, u Prof PS Shukla u la kyntu ïa ka JAC ba kan ym pynlong shuh ïa ka jingïakhih ba khlem buh por khlem da pynshisha shwa ïa ki mat jingdawa jong ki.
Ha kajuh ka por u nongïalam ka JAC u la kynnoh ruh ïa u VC ba u la shu kynnoh khlem dei halor ki mat jingdawa ba ka JAC ka buh. “Na ka liang u VC u khlem ai satia kino kino ki jingshai halor ki ishu kiba la rah ha ka jingkren bad ki lad pathai khubor ha ka 8tarik Naiwieng haba ïadei bad ka jingthung beain ïa u technical officer/senior consultant bad halor ki sienjam ba la shim ban weng noh ïa u.”