Jowai, Nailar 27: Ka kynhun ïalehkai jong ka Sikai FC kala long ka nongjop ha ka jingïalehkai kaba la long hynnin ka sngi Saitjaiñ da kaba pynliem ïaka Mawryngkneng Mission FC lyngba ka jingïashut Tie Breaker da 4-2 kol, haka lympung ïalehkai phutbol jong ka 7th Invitation Wahiajer Football Tournament 2023 ba la pynïaid da ka Wahiajer Sports Club.
Da kane ka namjop ka Sikai FC kala ïoh ka laïoh ban bteng ïa ka lynti ïaid ban rung sha ka Semi Final jong kane ka lympung.
Haba phai sha ka jingïalehkai hapdeng kine ki ar kynhun ka Sikai FC bad ka Mawryngkneng Mission FC, ka jingïakhun ka long marïabiang, bad ïathep mar shi 1-1 kol bad bad ym shym la don ba lah ban pynïakhlad haduh kaba kut jong ka 90 minit.
Ïa ki kol kaba nyngkong la thep da ka Mawryngkneng Mission haka minit kaba 12 lyngba u Ledrik War, hynrei ka kynhun Sikai FC kala ïoh ban pynphai kylla ïa katei ka shi kol haka minit ba 65 lyngba u Guiding Suna.
Hadien jong kane ka jingïakhaid la hap ban pynïakhun noh da ka jingïashut Tie Breaker ha kaba ka Sikai FC kala jop da 4-2 kol.
Ïaka nam Man of the Match la ïoh rah da u rangapkol (Goalkeeper) jong ka Sikai FC, u Edison Suna.
Ka jingïakhun ba bud kan long haka 31 tarik Nailar, 2023 hapdeng ka MLP Football Team pyrshah ïa ka Thadlaskieñ Veterans, bad ka por kan long 2 baje nohphaisngi kaba long ruh ka Quarter Final ba ar jong kane lympung.
