Shillong, K’Lyngkot 03 : Ka Meghalaya ka la ïoh ban rung mynta sha ka Final Round jong ka 76th Men’ National Football Championship jong ka Santosh Trophy hadien ba ka la lah ban pynïakhaid da mar 2-2 kol bad ka Odisha, kaba dei ka kynhun trai haka ha ka jingïakhun kaba khatduh na ka Group-5, kaba long ha Bhubaneswar ha ka sngi sdang jong mynta u snem.
Ha katei ka lympung, dei tang ki hynriew tylli ki kynhun kiba wan ha khlieh duh jong ka miej ïa kheiñ ryngkat bad lai tylli ki kynhun kiba wan ha ka kyrdan kaba ar kin poi sha ka kylla kaba khatduh ne ka final round.
Shwa jong kane ka lympung ïalehkai, ka Meghalaya ka la lamkhmat ha ka Group hynrei ka hap ban kiar na ka jingshah rem ha ka Odisha kaba wan ha ka kyrdan kaba ar khnang ban pyntikna ba kan ïai neh ha ka kyrdan kaba nyngkong.
Ka jingïakhun ka la long kaba ïakhaid bha tad haduh khyndiat minit shwa ban kut ka kylla step. Ïa kine ki kol la ïoh ban thep da u Allen Lyngdoh jong ka Meghalaya ha ka minit kaba 45+1 hynrei tang hadien ar minit, kata ha ka minit kaba 45+3 ka Odisha ka la ïoh ban pynphai noh lyngba u Prabin Tigga.
Shwa ba ka jingïalehkai kan dap shi kynta, ka Odisha lyngba u Chandra Muduli ha ka minit kaba 59 ka la ïoh biang ban lamkhmat sa shi kol, kaba la pynlong ïa ka kynhun jong ka Meghalaya baroh kawei ban khihwin. Ha kum katei ka por, ka Meghalaya ka donkam sa shi kol na ka bynta ba kan ïoh ban bat ïa ka kyrdan kaba hakhlieh duh bad kane ka la urlong lyngba ka kol kaba la ïoh ban thep da u Everbrightson Mylliempdah ar minit shwa ban kut artad ka kylla miet.
Haba phai sha ka kynhun ïalehkai ka Jylla, ka kynhun ka la ïoh ban khur haduh 11 point na ki san tylli ki jingïakhun. Nyngkong ka la sdang da ka nam ïakhaid pyrshah ïa ka Sikkim kaba don mynta ha kyrdan kaba lai bad hadien kane pat ka la bteng ïa ka jingjop ïa ka Telangana, Andaman & Nicobar Islands bad Pondicherry ha shwa jong katei ka jingïakhaid ha katei ka sngi.
