Tura, K’lyngkot, 19: Ki Pulit jong ka Tura Police Station ha ka sngi thohdieng ki la kem ïa uwei u briew uba la rung jubor hapoh ka Pa Togan Nengminza Athletic Stadium, Tura bad pynjulor ïa katto katne ki bynta jong ka madan mareh sports. Hadien ba la kem ïa une u briew, ki Pulit ki la rah noh sha thanat na ka bynta ban pynlong ïa ka jingtohkit.
Ka Director jong ka tnat Sports and Youth Affairs jong ka Sorkar Jylla ha u kyrwoh ba la phah sha ki lad pathai khubor ka la ong, “ka jingpynjulor bad ka jingpynjot ïa ki mar nongkynti jong ka Sorkar ka dei ka kam bymman kaba ngat ha ka jingshah pynshitom. Lah ruh ban kdew hangne ba kum kine ki jingleh beaiñ ka long kum ka jingpynjot ïa ki jingmyntoi ba la mang kyrpang na ka bynta ka bha ka miat jong ki paidbah bad ka jingkyntiew ïa ka sports.”
“Ka Pa Togan Nengminza Athletic Stadium, Tura ka long ka shlem ba kongsan bha na ka bynta ki nongïalehkai sports jong ka thaiñ, ki khynnah bad ki samla jong ka Tura kiba angnud ban pyntbit ïalade ha ka jingïalehkai sports, nalor ba ïa kane ka madan la ainam sha u nongïaleh laitlaid. Kane ka jingleh riewkhlaaw, ym tang ba ka long ka jingpynjulor ïa u Athletic Track hynrei ka long kum ka jingkhanglad ïa ka jingangnud jong ki khynnah, kaba pynpaw ruh ïa ka jingbym don jingkitkhlieh na ka bynta ka jingmyntoi jong ka imlang ka sahlang,” la bynrap u kyrwoh.
“La kyntu ïa ki paidbah ba kin long kiba peitngor bad ban ai jingtip lada ki lap ïa kino kino ki jingpynjulor ïa kane ka madan ïalehkai kaba la shna khnang na ka bynta ka jingmyntoi jong ka imlang ka sahlang. Ka jingïatreilang bad ka jingkitkhlieh lang jong ka imlang ka sahlang ka long kaba donkam ban pynneh pynsah bad ban ïada ïa ki nongkynti u paidbah,” la ong shuh shuh ka Director.
