Nongpoh, KLyngkot 27: Ha kawei ka jingjia aksiden kaba shyrkhei u wei u briew u la ïap syndon hashen katba u wei u la mynsaw jur hadien ba kawei ka truck ka la rat ïa 2 tylli ki kali bad kawei ka dukan harud surok bah National Highway-6 haka shnong Pahamrioh ha Ri-Bhoi District.
Katkum ka jingtip bala ioh lum la ong ba kane ka jingjia ka la jia hynnin ka nohphai sngi ha ka por 12 baje eiei ha kaba katei ka trok kaba don ïa u number AS 01 MC 8136 kaba la kynnoh ruh bala pynher sted da u nongñiah kala leit ban rat beit ïa kawei ka Auto Rickshaw kaba don ïa u number ML 10 C 9558 bad ïa kawei ka Maruti Eco kaba don ïa u number ML 10 B 8800 kiba dang shu dep sait kumjuh ruh ïa kawei ka dukan kaba don ha kane ka jaka hadien ba u nongñiah katei ka trok um lah shuh ban tehlakam ïaka kali.
Ha kane ka jingjia u nongñiah jong ka Maruti Eco u ba la tip kyrteng kum u Anshu Kumar (20) u la khlad hashen hadien ba u la shah rat ha kane ka trok katba u dang ñiat pynrkhiang ïaka kali hadien bala dep sait bad u wei u nongñiah jong ka auto rickshaw u la mynsaw jur bad la pynkit mar mar sha Civil Hospital Nongpoh bad namar ka jingmynsaw kaba la kham jur la pynkynriah noh sha Hospital sha nongbah Shillong ban ioh ka jingsumar kaba kham paka.
Shuh shuh u nongñiah katei ka trok u la phet krad ïalade na katei ka jaka bad naka liang ki pulit jong ka Nongpoh ki dang pynlong ka jingtohkit ban thwet ruh ïa u nongñiah katei ka trok.
